Ün giubileum ed üna derniera al Grond Premi

«Da giovar a curling es per mai ün pa sco per otras persunas il chant», disch Markus Solinger, sch’el quinta da seis sport predilet. «Dürant üna partida suna plainamaing pro mai svess e poss laschar da la vart tuot quai chi m’occupa güsta.» Cha’l curling saja ün gö plain tensiun, plain gust e frust, ün sport emoziunal, «ma ingio chi’s va lura davo la partida a baiver alch insembel».

Ün viva sül Grond Premi

In tavellond cul secretari general da la Lia Rumantscha davart seis passatemp preferi, as doda e vezza seis milli gust. Fingià d’uffant ha’l imprais a curlar sün Trü a Scuol, l’areal cumünal da sport cun bogns e glatschs. Il giuven Markus Solinger es dvantà bod commember dal club e giova daspö blers ons pel «CC Scuol», il Curling Club Scuol.

Quist’eivna po Markus Solinger invidar – sco president dal comitè d’organisaziun – al 30avel «Grond Premi» da Scuol. Il CC Scuol po dimena far viva sül giubileum da seis turnier da tradiziun chi varà lö da venderdi fin dumengia, dals 16 als 18 schner 2026.

Tanter 20 e 30 squadras

Il Grond Premi ha gnü sia premiera dal 1996. El es nat our dal «Turnier internaziunal». «Il Grond Premi ha lura cumanzà quels ons cun var 20 squadras», s’algorda Markus Solinger. Dal 2005, avant 21 ons, ha el lura surtut il presidi da l’organisaziun, fond però üna cundiziun a seis antecessur: «Eu fetsch da president be fin cur cha nus vain insembel 30 squadras al Grond Premi.» Per ragiundscher quai s’haja il CC Scuol partecipà a turniers utrò, quai chi haja portà früt. Markus Solinger: «Fingià davo pac temp d’eiran nus al Grond Premi sün 30 squadras. Meis böt d’eira insè ragiunt davo pac temp, ma da schmetter cul presidi nun es gnü in dumonda, eir perquai ch’eu n’ha adüna organisà jent il turnier.»

Intant es il nomer da squadras darcheu gnü redot sün 20 equipas, simplamaing per nu surchargiar il program da gös e per rivar da giovar tras l’inter program in trais dis. Daplü co la mità da las squadras vegnan sü da la Bassa, trais vegnan dal Tessin ed il rest sun equipas da la regiun – üna vain eir nan da la Val Müstair.

Giovar a curling davant culissa imposanta

Sper la Coppa Romana a Silvaplauna es il Grond Premi da Scuol dimena ün dals gronds turniers da curling illa regiun. Intant cha la «sour gronda» in Engiadin’Ota vain giovada quist on (11 fin 14 schner 2026) pella 57avla jada e cun 76 squadras sper il Lej da Silvaplauna, es pro’l Grond Premi da Scuol tuot ün nomer plü survisibel. E be listess es Markus Solinger inchantà: «Ün turnier openair, sün Trü, davant quella culissa da las muntognas engiadinaisas, quai daja simplamaing d’inrar.»

Insomma sajan las cundiziuns da giovar al liber otras co in üna halla, sco cha’l president dal Grond Premi declera: «In üna halla es tuot fich constant cun curlar. Sün Trü es il glatsch bain eir artificial-regular e preparà tenor las reglas da l’art. Ma listess è’l plü irregular co in üna halla ed il sulai po avair üna grond’influenza sül gö. Minchatant voula eir ün pa furtüna. I po dar surpraisas.» Natüralmaing ch’el svess nu decleress mai sias victorias al Grond Premi sco üna roba da furtüna! Quatter jadas ha Markus Solinger nempe guadagnà il turnier in differentas constellaziuns. Ma el conceda cun ün surrier: «Cha noss collegas da Sent han fingià guadagnà tschinch jadas, quai am secca schon ün zich!» – Ils premis, in valur da passa 12 000 francs sun in mincha cas sponsurisats e pronts eir quist on per mincha singula giovadra e giovader.

Sperar sün bell’ora

Per l’ediziun da quist on spera Markus Solinger sün bun’ora, almain tant buna ch’ella permetta da giovar al liber sün Trü. In cas da trid’ora füss reservada sco alternativa la halla da glatsch a Gurlaina. Ma per Markus Solinger esa cler: «Eir scha vi’n Gurlaina pudessan nus giovar tras il turnier, tuot l’atmosfera particulara chi caracterisescha il Grond Premi füss ruotta.»

Per Markus Solinger sarà l’ediziun giubilara da quist on – inclusiv program festiv la sonda saira – però eir üna derniera. Davo 21 ons surdà el il presidi ad Adrian Itten: «Eu sarà lura bain ün pa trist da surdar quista bell’incumbenza, ma sgür eir cuntaint da pudair giovar in avegnir il turnier sainza incumbenzas organisatoricas.»

Markus Solinger nu surdà il turnier dimena davo avair ragiunt 30 squadras partecipantas, ma quel on cha’l Grond Premi da Scuol ha ragiunt seis 30avel anniversari.