Treis variantas per traversar la Val da Riein

Il studi cun treis variantas per colligiar la fracziun da Riein cun il quartier da Signina sebasa sin ina decisiun che la suprastonza communala dad Ilanz/Glion haveva priu ils 27 d’uost 2025. Lu ei vegniu concludiu da sclarir tgei pusseivladads ch’ei dess da surmuntar la Val da Riein. Las variantas ein vegnidas elaboradas d’inschigniers professiunals e suttamessas dalla vischnaunca ad ina examinaziun preliminara entras igl Uffeci cantunal da construcziun bassa.

Punt, punt pendenta ni sanar la cabina

Emprema prioritad en caussa traversada dalla Val da Riein ha tenor il president communal Marcus Beer la segirtad. Ed en secunda lingia gioghien ils cuosts ina rolla decisiva.

La vsichnaunca ha schau evaluar treis variantas co ins savess surmuntar la Val da Riein. Aschia han ins evaluau la construcziun d’ina punt cun pilasters da betun ed ina construcziun da lenn sissu. Quella punt semegliassi quella che traverseschi la Val da Carrera denter Valendau e Versomi, di Marcus Beer. «Per baghegiar ina tala punt duvrass ei mesiras da construcziun considerablas el funs dalla val.» La secunda varianta ch’ei vegnida examinada ei ina punt pendenta. Cheu ei vegniu fatg in studi davart la realisabladad per ina tala punt cun ina lunghezia da circa 100 meters. Quella punt stess surtut a disposiziun al turissem ed a pedunzas e pedunzs denter Pardi e Signina. E sco tiarza varianta ha la vischnaunca schau evaluar la sanaziun dalla pendiculara existenta denter Pardi e Signina che astga actualmein mo aunc vegnir duvrada da possessurs da suloms da Signina.

Il motiv pil studi

Marcus Beer ha declarau en discuors cun la  FMR il motiv ch’ins hagi evaluau alternativas. Il problem seigi che la pendiculara da Riein a Signina seigi veglia e che la tecnica stuessi vegnir renovada per saver cursar per tut las passagieras ed ils passagiers. Las lavurs necessarias per tener en funcziun la pendiculara e garantir la segirtad dil menaschi seigien vegnidas exequidas. Enteifer ils proxims tschun onns drovi ei denton ulteriuras lavurs da manteniment, aschia il president communal dad Ilanz/Glion.

Punt nunrealistica

La punt sur igl ual vi el funs dalla val ei ord il pugn da vesta dil Cantun sco emprema instanza d’evaluaziun strusch realisabla. Quella punt cuntegni memia biars aspects da prighels e savessi buca vegnir lubida dil Cantun, di Marcus Beer.

Tier la punt pendenta di il president communal che quei fussi ina buna purschida surtut pil turissem da stad. «La punt pendenta custass biabein in miez milliun francs. Il handicap tier ina punt pendenta ei ch’ella sa buca vegnir utilisada dall’agricultura.»

Tenor Marcus Beer savessen ils basegns turistics denton vegnir integrai en la sanaziun dalla pendiculara che custass cun in sistem d’autostart circa 1,2 milliuns francs. «Nus essan fetg leds d’haver uss in studi da variantas ch’ei ina buna basa per la gruppa da lavur che s’occupescha dalla colligiaziun Pardi – Signina»

Gruppa da lavur cun proprietaris

Alla gruppa da lavur appartegnan era ils proprietaris da suloms da Signina. Marcus Beer: «Sche nus realisein in project ni l’auter vegn ei fetg probabel a dar ina procedura da perimeter. Perquei eis ei impurtont ch’ils proprietaris da suloms seigien involvai era ella fasa da decisiuns.»

Viadis a pei pretensius

Marcus Beer di ch’ils viadis a pei da Riein a Signina e da Pitasch a Signina seigien grevs e per part prigulus d’absolver. En scadin cass seigien quellas sendas fatgas per ir a pei. Era cun ina punt pendenta seigien las vals memia malsegiras sco ruta da bike. Alla fin vegni il suveran a decider all’urna davart il credit, di il president communal.