Igl siemi d’egn clavo par ragatar

Ragato vean atgnameing an la grepa. Mo igl sport pudess bagnbòld ear vagnir practitgieu an egn clavo an la Valragn – agl Kletterstall Hinterrhein. Egn’uniùn cun quel num s’angascha pigl project. Thomas Egger e bagn a la testa da la sozietad, e dantànt betg egn gripligneader zund passiuno. «Jou sund ear schon sto a Cuira a saragatar cugls meas matatschs, dantànt ve jou ear ànc oters passatains ca mi plen», gi el.  

Sper promover igl sport dat igl ear ànc oters motivs par s’angaschar pigl project d’egn clavo par saragatar: An la regiùn, an la Valragn a conturn, dat igl betga blearas pussevladads par passantar igl tains liber – cunzund betga da por’ora. «Igl e fetg don da schar ir an muschna igls bietgs betg utilisos an las vischnàncas. Parquegl e’gl par me egna grànda tgossa da restructurar igl clavo Luss», declara Thomas Egger c’e carschieu sei a Ragn/Hinterrhein.

Grànd project a grànds custs

Sco blears oters bietgs agricols vigls an las vischnàncas – oravànttut clavos – e’gl ear igl clavo Luss, ca s’oda ad abitànts da vacànzas, ca va plànsieu an muschna. Da davànt paran las pares ànc dad easser antieras, mo da tschella vart sapreschainta la realitad da maniera diferainta: La lena e martscha, igl vent schivla tras las largias ad igl material par midar las essas rutas spetga gea da passa veintg ons annà, bagn ampluno segl plàn sura. Mo là duess dalùnga vagnir realiso igl indrez da bouldrar.

La fegnamira da l’uniùn Kletterstall Hinterrhein, tgamunada da Thomas Egger, fuss igl da transfurmar igl vigl clavo an egna hala da saragatar igl on ca vean. Que project custa var 560 000 fràncs. Cun atgnas prestaziùns lessan igls cumembers da l’uniùn spargnear zirca 129 000 fràncs. Igl president Thomas Egger lascha valer: «La ple grànda sfida e dad anzuma radember igls daners ca nus vagn da basegns par realisar igl project.» Schagea c’igl vaschinadi da Valragn ad ear oters sponsurs sustegnan finanzialmeing igl project, mànca tutegna ànc egna detga plùna daners. Cun egn crowdfundig sen la platafurma da Lokalhelden da la Bànca Raiffeisen less l’uniùn radember las finànzas. Antocen igls 2 da favrer 2026 sa mintgegn a mintgegna c’â interess sustaner igl project.

Sponsurs generus

Antocen l’avertura digl clavo par saragatar ân igls diesch cumembers ànc egna massa lavur. La stad passada, igls 14 da zarcladur 2025, ân igls giuvens angaschos fundo l’uniùn Kletterstall Hinterrhein. Antschiet la lavur ân els cun sclarir cun igls possessurs digl clavo, sch’els viglian anzuma colavurar a realisar igl project agl bietg ca s’oda tier lur tgea.

Generusameing surdatan igls patrùns lur clavo gratuitameing a l’uniùn. Durànt egn’eanda ân igls voluntaris da la suprastànza alura svido igl antier clavo, me las essas novas par la fatschada ân astgieu star liaint.

Igl bietg original e trapartgieu an quater spazis. Cun transfurmar igl bietg vean sbuo egn palantschieu – ascheia resultescha digl màn dretg egn’òlteztga da var 10 meters par saragatar. Digl màn saniester da màn sut satgata alura la gardaroba, egna lotga ad egn local par saregistrar. Visitaders novs pon ear saregistrar online, liger las directivas a cunfirmar ca mintgegn setgi co duvrar igl material. La raspunsavladad e an mintga cass tgossa da la cliantela. A Thomas Egger declara: «Cumembers digl Kletterstall Hinterrhein ân egn aczess ple sempel a ston betga saregistrar mintg’ea.»

Co igl clavo vean a vaser or an detagl, a co igls suprastànts schleian exactameing igl check-in – peia l’antrada agl clavo – stat dantànt ànc an las stélas. Mo bi ussa san ign gir, c’igl e egn project da cuminànza ca mussa, tge ca pudess tut easser pussevel da realisar an egn clavo vigl.