Grazia a Betty Bossi ed Ajax – il tip

La vignetta 2025, il tatgader che autorisescha da charrar sin l’autostrada, è valaivel anc enfin ils 31 da schaner. Tgi che ha gia tatgà la nova vi da l’auto po emblidar il cussegl ch’jau As preschent oz. In mais toleranza dat la polizia, e betg dapli. Damai: Primo betg emblidar da cumprar la vignetta 2026. Secundo er tatgar quella al dretg lieu. I pudess esser che quella spetga plain pazienzia sin il mantun – enfin ch’ins dat in stausch a sasez e liquidescha la pitschna lavur.

I na fiss betg ina gronda chaussa. Simplamain plazzar la nova dasper la veglia. Collecziunar las vignettas veglias, metter en retscha ellas ina dasper tschella, na va betg. Las directivas da la polizia lubeschan betg ch’ins tapezescha la fenestra da la front cun vignettas. Perquai èsi d’allontanar l’emprim la veglia. Enfin uss era quai ina lavuratscha nunpussaivla. Quest onn èsi i fitg svelt. Entaifer 30 secundas era la fanestra libra per la vignetta 2026. Grazia a Betty Bossi ed Ajax!

Gea, vairamain, i n’è betg ina sgnocca. Damai mes cussegl confidenzial: Prendai la buttiglia dad Ajax, il liquid da nettagiar fanestras, e squitrai in pau da quai sin la vignetta veglia. Cun agid da palpiri da tegnairchasa na datti nagina portgaria. Laschai agir intginas secundas il liquid. Alura prender en funcziun la nizza cun la manetscha cotschna da Betty Bossi. Quella ch’ins dovra da schubregiar la platta da cuschinar. Quest instrument stauscha davent, senza grond sforz, la vignetta nunvalaivla. Jau as garantesch: I n’è betg ina lavuratscha. L’alternativa da tut quai è da cumprar la vignetta digitala. Ma gliez è in’autra istorgia.