Pratic ed aristocratic

L’onn passà è la Regenza anc trottada en la terma da Val per far sia fotografia annuala, tradiziunala, uffiziala – quest onn è il lieu in pau pli «pratic»: il «oval office» grischun en la Chasa grischa a Cuira.

La nova fotografia da classa cun ils commembers e la commembra da la Regenza ed il chancelier mussa er: Ella ha definitivamain chapì la nova lingia politica: aur ed opulenza.

La sala da la Regenza en la Chasa grischa è vegnida bajegiada ed ornada pumpusamain cun stuccaturas en stil baroc da la famiglia aristocrata von Salis. In auter aristocrat, il president american Donald Trump, visita gea bainprest il WEF a Tavau … e quel ha gea era gugent la gronda show pumpusa. È pia tut stà planisà ed enfilà da vart grischuna, dal president da la Regenza da quest onn, da Martin Bühler?

Ma i dat anc auters detagls picants sin la fotografia guvernamentala che dattan perditga dal clima politic dal 2026:

Il decret da cravattas! – Betg mo Selenskyj ha stuì sentir: Senza cravatta na vai betg a tractar bain cun ils ritgs e pussants da quest mund. Quai han er ils umens-regents grischuns chapì: La cravatta sto si! Saja quai en stil floral sco tar Martin Bühler u lura cun sdrimas diagonalas sco tar Marcus Caduff.

Il candelaber pumpus en stil venezian ed il gigantic tarpet persic mussan las ambiziuns internaziunalas dal Grischun durant l’onn 2026. Suenter ch’il president american ha fatg seriusas avanzas da conquistar la Grönlanda, fissi forsa nairas uras per il Grischun per daventar in pau imperialistic … Co fissi cun reconquistar la Vuclina?

Apropos «nairas uras», igl è forsa mo in pitschen detagl, ma: Nagin na porta in’ura, u almain betg visiblamain. E quai malgrà ch’il chalender da termins vegn ad esser bain plain ils proxims mais. Il 2026 è l’onn d’elecziuns en il Grischun. Ed i va lura per la dumonda, tgi che dastga en in onn insumma puspè sa laschar smincar e tgi che dastga puspè seser vi da questa maisa (u perfin sin la maisa sco Carmelia Maissen). – Spievel spievel (d’aur) vi da la paraid, tgi vegn e tgi va?

Sco finiziun saja anc rendì attent a las soccas blauas da caro da Peter Peyer. Daco? Simplamain uschia! Sin Instagram ha il chanal uffizial dal chantun Grischun dumandà – mo en lingua tudestga – ses followers en connex cun il setting da fotografia da la Regenza: «Welches Sujet könntet ihr euch für das nächste Jahr vorstellen?» – Nus proponin: dapli soccas blauas, e damain aur!