Per «te» cun prenzi Albert igl II.

«Hall of Fame» è ena onorificaziun internaziunala per persunalitads u er per prestaziuns particularas seia chegl aint igl sport, tar la scienza, tar l’economia ed er per la musica. Las persungas tgi vignan undradas survignan er ena tavla commemorativa, tgi vign plazzada an en li, cugl qual la persunga undrada ò ena relaziun speziala. Tar Giancarlo Torriani, igl anteriour pilot da bob internaziunal è chegl la tgesa da partenza digl vial da bob da Son Murezza a Schlarigna, er numno bobrun olimpic. La rancunaschientscha internaziunala ò Giancarlo Torriani retschet l’emda passada a caschung d’ena ceremonia festiva a Son Murezza e chegl lò, noua tgi igl vial da bob cun ena lunghezza da 1722 meters scumainza.

Igl anteriour hotelier da Beiva è betg sto igl sulet undro, èn anc quatter ulteriouras persungas tg’on cugl sport da bob ena ferma relaziun neidas undradas. Tranter oter er Albert Alexandre Louis Pierre Rainer Grimaldi, prenzi Albert igl II. da Monaco. Onorifitgias èn er nias Hansjörg Trachsel, igl anteriour cunsiglier guvernativ digl Grischun, Thomas Caplazi, ancunaschaint davant e davos las culissas digl bob da vial da Son Murezza ed alloura er Christian Meili, siva da 22 onns commember dalla cumischung digl vial da bob olimpic da Son Murezza. La glista dalla prominenza da bob tg’è commembra digl club «Hall of Fame» è lunga. Tranter oter èn chegl Erich Schärer, Jean Wicki, Hans «Hausi» Leutenegger u er Gunter Sachs.

Igl 1977 sto campiun svizzer

Giancarlo Torriani, cun annada 1947 è betg angal sto, ed è anc oz en bung pilot schi vo per eir oragiu digl vial da glatsch cugl bob da Son Murezza a Schlarigna. Igl 1977 è el davanto campiun svizzer cugl bob a quatter. Pi tard è el sto ples onns trenader digl team naziunal da bob taliang. Sessour è Giancarlo Torriani er sto divers onns president dalla Federaziun svizra da bob (1992 – 1998).

Oz ò el anc adegna ena ferma relaziun cugl sport da bob e cugl olimpic bob run a Son Murezza cun adegna puspe palar igl bob nostalgic oragiu digl vial da glatsch u er esser angaschea tar cursas scu la davosa fegn d’emda tigls campiunadis da bob dall’Europa. Chel onn tg’el è nia cugl sies treis omens Patrick Mayer, Orlando Ponato e Ruedi Schmid campiun svizzer è igl Bivian er sto selecziuno pigls campiunadis mundials da bob e lò nia 5avel cugl bob a quatter. Vetiers è Giancarlo Torriani actualmaintg er president digl «Oldiebob Club Bivio».

Adegna do bungs cunsegls

Cugl prenzi digl Principadi da Monaco Albert igl II. ò Giancarlo Torriani siva passa 40 onns ena relaziun fitg ampernevla. Igl Bivian ò detg: «Cun canoscher el gio quatter decennis sunga per te cugl regent monaghes.» Igls sies bungs ameis e las persungas tgi stattan agl prenzi pi manevlas nomnan el «monsegnieur», ò menziuno Giancarlo Torriani.

Cura tgi igl prenzi da 68 onns era anc activ scu bobist ò igl anteriour hotelier da Beiva adegna pudia dar agl sportist da Monte Carlo bungs cunsegls scu palar igl bob, tot tenor vial da bob noua tgi dat tocs pi difficils durant la cursa e scu tg’è da curriger u piglier en’otra lengia per esser anc pi spert. Gio tigls gis olimpics digl 1984 a Sarajevo vegia el dastgea dar a prenzi Albert, igl II. cunsegls avant las cursas u durant las cursas. Giancarlo Torriani dei: «Da lez taimp era trenader digl team da bob dall’Italgia ed uscheia er adegna gia contact cugl ancunaschaint pilot da bob digl Principadi da Monaco.»

Taliang e franzos e betg tudestg

D’antupar igl prenzi l’emda passada a Son Murezza seia sto en antop fitg ampernevel ed er agreabel, ò detg Giancarlo Torriani. I seia er uscheia tgi igl Monaghes vegia er adegna plascheir da pudeir discorrer taliang, en lungatg tg’el vegia gugent, ò menziuno Giancarlo Torriani. Franzos discorra el er savens, dantant tudestg betg schi gugent, tiers tg’el saptga chel lungatg. Scu igl Bivian è er Albert Alexandre Louis Pierre Rainer Grimaldi nia piglia se aint igl club exclusiv «Hall of Fame» cun el aveir gronds marets pigl sport da bob. Tranter oter è el er siva digl 1985 commember digl comite olimpic internaziunal. Digl reminent è igl prenzi sto gist tschintg gedas dalla parteida scu bobist a gis olimpics, dantant cun pi pac success. Fatg ò el alloura er gio la cursa da ralley Paris – Dakar.

Giancarlo Torriani ò er detg tgi igl sies amei digl Principadi da Monaco seia er en bung golfist e navigar a tenda seia er egn da sies sports preferias. Igl Bivian ò er managea tgi igl prenzi seia ansomma en grond amatour da sport e promova er savens igl sport. Tar egn digls sies sports preferias totgan er las cursas d’autos dalla furmla 1 cun mintg’onn er aveir li a Monte Carlo ena cursa tgi chinta pigl campiunadi mundial. Giancarlo Torriani punctuescha tgi seia eneda daple sto en veir evenimaint d’antupar igl prenzi e da star cun el an cuminanza e discorrer digls taimps passos cura tgi tots dus eran anc bobists activs.