En om cun en grond cor

Siva da diesch onns è usit tgi la «Südostschweiz» segna per la concurrenza tge persunalitad grischuna tgi mareta da retschever chel tetel. Er per l’ediziun actuala digl schinumno voting on las redacziuns da tots canals da medias dalla «Südostschweiz» fatg ena selecziun cun seis persungas tgi vignan an dumonda per davantar «persunalitad digl onn» 2025. Scu tgi Kristina Schmid, la redactoura dalla gasetta online dalla «Südostschweiz» ò detg anvers la FMR ins varda d’aveir tranter las persungas nominadas persungas dall’economia, digl turissem, dalla cultura, digl mond social ed er digl sport. Impurtant seia tgi plessas spartas seian represchentadas, ò menziuno Kristina Schmid.

Angal lectours e lectouras decidan

Tge persunga tg’ò l’onour da davantar «persunalitad digl onn» 2025 decidan scu gio las davosas 9 gedas sulet igls lectours e las lectouras dalla «Südostschweiz». Igl è betg uscheia scu tar otras concurrenzas, noua tg’ena giuria ò er influenza sen la tscherna. Igl è alloura er angal pussebel da dar eneda la vousch alla persunga favorita e betg plessas gedas. Per la «persunalitad digl onn» 2023 eran tranter igls nominos er stos cun Claudia ed Andreas Züllig, igls patrungs digl hotel «Schweizerhof» a Lai. Er nomino è chel onn sto Daniel Albertin, igl mastral digl cumegn d’Albula/Alvra. Fatg la cursa on alloura igl hotelier e la hoteliera digl hotel «Schweizerhof» e betg scu da blers spitgia igl mastral angaschea digl cumegn d’Albula/Alvra an connex cun la situaziun da Brinzauls.

Mintga mesemda aint igl parc digl martgea

Sa tgapescha tg’el vegia grond plascheir d’esser tranter las seis persungas nominadas per davantar «persunalitad digl onn» 2025, ò detg Werner Erb anvers la FMR. Igl pedagod social, el dall’annada 1950, è en om cun en fitg grond cor, ena persunga fitg averta, en uman cun ena immensa energeia ed an veir senn ena persunalitad schi sa tracta per angaschamaint da gidar a persungas dependentas da drogas. Siva da 15 onns presta Werner Erb an chella tgossa lavour exemplarica ed activitad tgi mareta tot respect. Mintga mesemda, da tottas oras, da mintga staschung è el igl sivamezde preschaint a Coira aint igl parc digl martgea e prova da manar persungas dependentas da substanzas narcoticas e d’alcohol an en migler avigneir. Werner Erb ò en dung aparti da far chegl, fò el chegl cun ena sinceradad exemplarica e cun ena confidanza singulara. La fegnameira da sia gronda lavour sociala è tgi chellas persungas cattan puspe igl equiliber da lour veta, tgi vegian puspe plascheir digl mintgade e tgi sa cattan tar sasez. Per neir ad en resultat positiv ò d’esser avant mang l’attaschedadad tar chellas persungas e gist chella mantga tar Werner Erb betg. Cun la sia tiba procura el betg angal per bels tungs, na el gudogna uscheia er la simpateia dallas persungas dependentas da drogas e dad oters meds sumigliaints.