«La finamira ei il campiunadi mundial»

Jon-Fadri Nufer (21) ei il frar giuven da Cla-Ursin Nufer (24). Omisdus ein carschi si en Val Tujetsch ed ein leu era commembers dil club da skis. Tonaton ei lur dacasa dapi plirs onns a Tavau. Leu han els cundiziuns idelas da trenament, era grazia alla vischinonza a lur trenader da Swiss Ski, Toni Livers, medemamein in Sursilvan. «Miu frar ed jeu savein trenar communablamein, magari era cun ulteriurs curriders dils caders da Swiss Ski», di Jon-Fadri Nufer. Suenter la neiv dall’jamna vargada ein las cundiziuns da cuorer fetg bunas a Tavau. Tavau ha recaltgau dabia cumpetenza cul sport da cuorsa liunga ils davos onns, denter auter enten organisar cuorsas dil Cup mundial.

Claras finamiras

La partenza ella stagiun da cuorsa liunga 2025/26 ei reussida a Jon-Fadri Nufer ch’appartegn il secund onn al cader C da cuorsa liunga da Swiss Ski, sco gia ils onns vargai: «L’entschatta digl unviern hai jeu adina empau difficultads da vegnir el ritmus. Jeu sai denton che quei vegn meglier da cuorsa tier cuorsa. Daco che quei ei aschia sai jeu buc.» Tuttina: La fin da december ha el contonschiu igl excellent quart plaz el sprint dalla cuorsa da FIS a Campra. Ed era ella cuorsa da 15 km dil stil classic ha el perschuadiu leu cul 10avel rang. «En sesez ei il sprint buca mia disciplina. Jeu cuorel bia pli bugen distanzas pli liungas, mia preferida ei quella da 20 km el stil classic», di Jon-Fadri Nufer. Silla damonda, co el savessi giudicar siu svilup ils davos onns, di il Tuatschin: «Jeu crei ch’jeu seigi semigliuraus sill’entira lingia, mo surtut tecnicamein. Tuttina hai jeu aunc tscheu e leu deficits ch’ein d’eliminiar.»

Secumparegliar cul frar

Il trenament communabel cun siu frar Cla-­Ursin porscha a Jon-Fadri Nufer la pusseivladad da semesirar e da secumparegliar. La differenza da vegliadetgna da treis onns, respectivamein dalla prestaziun, ei buca pli gronda. «All’entschatta dalla stagiun era Cla-Ursin pli ferms ch’jeu, ussa currin nus rundas cun paucas secundas differenza. Quei ei per exempel stau il cass al Cup Continental a St. Ulrich el Tirol», di Jon-Fadri Nufer che ha empriu da miradur, mo che tschenta ussa professiunalmein tut silla carta cuorsa liunga.

«Sesentel meglier e meglier»

Ils resultats da Jon-Fadri Nufer d’entochen ussa quest unviern constattan: «Jeu sun cuntents e sentel ch’ei va meglier e meglier e hai in bien sentiment per las concurrenzas vegnentas.» La fin dall’jamna vargada ha el contonschiu il 21avel plaz ella cuorsa da 10 km classic dil Cup Continental a Seefeld. La fin d’jamna vegnenta parta el als campiunadis svizzers a Les Diablerets ella cuorsa singula da skating sur 10 km e la cuorsa classica da 10 km cun partenza da massa. In’jamna pli tard suondan lu concurrenzas dil Cup Continental a Gressoney Sain-Jean ella Val d’Aosta ell’Italia. «En quellas cuorsas less jeu empruar da far in emprem pass ella selecziun pils campiunadis mundials dils curriders sut 23 onns», di Jon-Fadri Nufer.

Danovamein al campiunadi mundial?

Ils campiunadis mundials da cuorsa liunga dils curriders sut 23 onns han liug l’entschatta mars a Lillehammer en Norvegia. Premissa per saver separticipar a quels ein dus resultats denters ils dudisch megliers d’ina cuorsa dil Cup Continental ni ina victoria als campiunadis svizzers. Jon-Fadri Nufer ha gia saviu separticipar igl onn vargau als campiunadis mundials U23 ed in onn avon a quels dils curriders sut 20 onns. In’autra gronda finamira ei da saver separticipar ils proxims onns a cuorsas dil Cup mundial. «Jeu sun optimists e fetsch il pusseivel», di il giuven Sursilvan.