Invista in l’archiv da fotografias

Cun sias passa 50 000 fotografias es la fototeca da la chesa editura Engadin Press a Samedan üna da las pü grandas collecziuns da fotografias istoricas dal Grischun. Quist s-chazi es gnieu surdo vers la fin da l’an scuors a la Fundaziun grischuna per la fotografia. In l’exposiziun extraordinaria a Cuira do ella insembel cul Museum retic üna prüm’invista in quists muonds visuels. Pü tard vegnan alura las fotografias digitalisedas e rendidas accessiblas al public interesso. Scu cha la fundaziun ed il museum infuorman ho la chesa editura Engadin Press edieu cartas postelas, giazettas e cudeschs. Las fotografias mussedas in l’exposiziun documenteschan persunas in lur activiteds professiunelas u düraunt il temp liber, in cumpagnia u tar activiteds sportivas. Per prospects da reclama e per cartas postelas sun fotografias gnidas retuschedas, concepidas scu collascha u cumbinedas cun elemaints grafics. L’exposiziun do ün’invista extraordinaria i’ls process da lavur da l’atelier da fotografer engiadinais. «Ella piglia cun se sün ün viedi tres il temp dal muond alpin grischun chi ho subieu üna müdeda rasanta al principi dal 20avel tschientiner cul svilup dal turissem modern.» La vernissascha da l’exposiziun i’l Museum retic es ils 23 da schner a las 18.00.