Observaziuns spontanas da Maria

Ella hagi entschiet cun quei il mars 2025, raquenta Maria Cavelti. Gl’emprem scriva la dunna els tschunconta ses patratgs spontans en in carnet. Semegliont ad in diari ein quels arcunai. Pliras ideas ed inspiraziuns spontanas noda ella el carnet. Cu entginas historiettas ein ensemen, transcriva ella quellas en ina datoteca. Sin quei ein ellas semtgadas per la lectura. La registraziun auditiv-visuala ei il pass suandont. Igl ei il pli decisiv ch’ella fa en sia stiva. «Jeu discuorel en miu lungatg da mintgagi ed ils videos ein fatgs da mei e cun miu telefonin, pia silla pli sempla moda pusseivla», san ins leger ell’introducziun dil mini-cudischet.

Cun telefonin ni tablet

Maria Cavelti applichescha ina nova fuorma da s’exprimer e far paleis patratgs. Ella scriva buca historiettas, mobein prelegia e raquenta quellas. Ella parta impuls ed observaziuns – cun agid digital. Igl ei in hobi niev che ha occupau ella intensivamein gl’onn vargau. «En tut hai jeu produciu circa 100 da quels cudischets», raquenta ella en stiva da sia habitaziun a Rueun. Silla meisa muossa ella entgins. Mintgin ei in product bibliofil cun cuviarta da curom da diversas colurs. Il format dil cudischet ei specials: Tschun centimeters liungs, tschun centimeters lads e strusch dus centimers gross. Pia tut auter ch’in cudischun.

Cun arver il cudisch en miniatura frunt’ins gl’emprem sill’introducziun dall’autura. Lecturas e lecturs san buca semplamein leger in text. Mintga cudischet cuntegn 30 historiettas da mintgamai treis tochen quater minutas. Ins sto buca leger, mobein astga tedlar ellas. E leutier drovan ins il telefonin ni il tablet.

Ironia e humor

«Mias historias cuntegnan empau verdad ed empau fantasia, ellas vulan ni offender ni perschuader zatgi, mobein sulettamein divertir», gi Maria Cavelti. Cul code QR han ins access al cuntegn. La vart seniastra d’ina pagina dubla ha l’autura illustrau cun musters da feglia, flurs, fuormas, rudials ni sulegls ch’ella ha dessignau cun tusch. Dalla vart dretga dalla pagina ei il code. Cun smaccar sil nuv da fotografar dil telefonin sesarva immediatamein gl’avis. Ins smacca sin quel e gia cumpara il purtret dalla raquintadra.

Maria tradescha observaziuns dil mintgagi. Sut il simbol dil code QR ha l’autura nudau mintgamai il tetel dalla historietta. Cun bia ironia e humor raquenta e tschontscha ella da quei e da tschei. «Ei ha levas, pli legras, precautas, grad sco il pletg ei carschius», manegia l’autura. Tgi che entscheiva a tedlar ses «priedis», sa strusch metter dalla vart il cudischet.

Buca sin YouTube

Persunas che han ina schliata vesida e difficultads da leger, san guder specialmein las buccadas auditivas. L’autura pren posiziun tier las pli differentas tematicas dil mintgagi: Per exempel gl’apparat da radio DAB+. Ni ch’ella taxescha il steamer e paleisa co ella ha sentiu la madrazza nova. En in autra historietta tschontscha ella dils surnums, en in’autra tradescha ella co ella ha cumpassiun cullas logopedas. Ni ch’ella valetescha miedis versus veterinaris. Ils cuorts patratgs e las constataziuns cun agid da telefonin ni tablet san forsa irritar, vulan denton inspirar e dar impuls. Igl ei ina fuorma da potcast. Cun siu hobi savess Maria Cavelti esser ina «influenzera», pia ina persuna che carmala applicaders e consuments virtuals. Ella snega quei, pertgei sia purschida exclusiva ei buca sin YouTube ni Spotify. Il pign mund romontsch ei memia pauc attractivs per fatschentas lucrativas.

Semegliont a scribentas e scribents che han plascher da lur publicaziuns, ha la pedagoga da Rueun plascher da sia fuorma da raquintar. «Jeu havess puspei semtgau silmeins 15», gi Maria Cavelti. Ils emprems cudischets culs texts auditiv-visuals ha ella fatg per amitgas ed amitgs, per sia famiglia e collegas da lavur. Ils resuns ch’ella ha retschiert cuntinuadamein motiveschan ella. Tematicas detti ei ad incuntin, conceda ella. Il plascher dil lungatg ha la pedagoga sociala ed anteriura scolasta primara adina giu. Duront ils 20 onns ch’ella ha dau scola ha ella cultivau quel. Zacu eis ella vegnida unfisa da curreger sbagls e dar notas. Il plascher da s’exprimer, raquintar e giugar cul lungatg po quella midada haver promoviu pulitamein.