La Regenza ha approbau la revisiun dalla planisaziun locala

Ils 2 da matg 2024 ha la vischnaunca da Medel approbau la revisiun dalla planisaziun locala ed ussa ha era la Regenza fatg quei. «Il motiv principal per la nova planisaziun ei stada en emprema lingia quel da risguardar las prescripziuns dil dretg da planisaziun surordinau», scriva la Regenza en ina communicaziun allas medias la gievgia. L’emprema etappa dalla revisiun dil dretg davart la planisaziun dil territori (LPT1) ha principalmein la finamira da frenar l’extensiun dallas zonas da construcziun sil terren cultivau e da direger il svilup dils habitadis.

Reduciu la zona da baghegiar

Tut en tut ha la vischnaunca da Medel reduciu sia zona da habitar, mischedada e dil center (ZAMC) per 41 256 meters quadrats. Gest a Curaglia ein plinavon vegnidas segiradas las structuras verdas e las vias naturalas ch’ein fetg impurtontas per la qualitad da habitar dil vitg, quei cun attribuir talas alla zona verda. La revisiun dalla lescha communala da baghegiar cumpeglia en special l’adattaziun e consequentamein igl augment dallas cefras d’utilisaziun e dallas dimensiuns dils edifecis en tuttas zonas da construcziun. Quei possibilitescha da concentrar la surfatscha da habitadi conform al maletg historic dil liug. La finala ei igl entir project da planisaziun vegnius accordaus culs pli novs plans dalla mesiraziun funsila e cullas prescripziuns dalla digitalisaziun.