In battagl niev las proximas jamnas

Ils 24 da december 2025 han ils zenns dalla baselgia parochiala s. Gions a Mustér clamau parochianas e parochians al survetsch divin da vigelgia Nadal. Cuort avon il survetsch divin allas 17.00 ei il zenn grond buca pli staus d’udir. Il motiv: Il battagl ei ruts permiez e curdaus. La part dil battagl culla rucla cun ina peisa denter 80 e 100 kg ha perforau dus plantschius da lenn el clutger ed ei sefermaus els quaders d’in tierz plantschiu.

Il motiv ei enconuschents

«Ils 6 da schaner 2026 ein representants dall’interpresa Muribär da Büron stai tier nus e han intercuretg il battagl. Igl ei semussau che quel haveva ina micro-ruttadira ch’era buca stada veseivla avon igl incaps», di Gion Tenner ch’ei responsabels per las immobilias dalla Pleiv s. Gions Mustér. Dil battagl rut ein las mesiras vegnidas pridas sco era la dimensiun dil zenn grond. «Las proximas jamnas vegn il battagl niev producius dall’interpresa Wensauer. Il termin da furniziun cuoza denter sis ed otg jamnas. Sil pli tard da Pastgas quintein nus denton ch’il battagl seigi montaus ed il zenn grond possi puspei resunar», di Gion Tenner. Il battagl niev ei calculaus cun cuosts da rodund 7600 francs. Proximamein duein era ils plantschius donnegiai vegnir reparai.

Interpresa specialisada

L’interpresa Wensauer cun sedias a Passau e Regensburg en Germania ein ina dallas grondas ed enconuschentas che producescha battagls ell’Europa. Ella fa quei era per differentas interpresas svizras sco per exempel Muribär. Sco ins sa leger silla homepage da Wensauer, construescha ella mintg’onn rodund 1500 battagls pli gronds e pli pigns. Dapresent eis ella vid la construcziun da treis battagls per ina baselgia en Finlanda ed era ils battagls da fier dils zenns da Nôtre Dame a Paris ein ord lur luvratori. Produci vegnan ils battagls aunc adina tenor il mistregn tradiziunal cun mazza e martials mecanics. Battagls construi da Wensauer san haver peisas d’entochen 660 kg per zenns per part da 18 tonnas.

Il zenn ei arrivaus 1916

Igl onn 1916 ei il zenn grond dalla baselgia parochiala s. Gions a Mustér arrivaus a Mustér. D’affons e giuventetgna, mo era d’umens carschi, eis el vegnius tratgs naven dalla staziun da viafier entochen spel clutger, nua ch’el ei la fin finala vegnius alzaus sin clutger. «Ils zenns dalla baselgia parochiala ein vegni construi a sias uras dall’interpresa Monzini dall’Italia», di Gion Tenner.