Fotografias da la Val Müstair cun o sainza legendas

Dürant ün mais muossa la Chasa Selm a Müstair üna collecziun da fotografias dal fotograf-piunier Johann Feuerstein (1871-1945) da Scuol. La vernissascha es als 28 da schner 2026. Sper üna selecziun da purtrets our dal relasch da la Fundaziun Fotografia Feuerstein as vezzaraja eir var 50 fotografias fattas in Val Müstair. Quellas s’haja nempe chattà pür d’incuort. Quai ha annunzchà la Clostra Son Jon a Müstair in üna comunicaziun a las medias. La clostra posseda e maina la Chasa Selm, ün’anteriura chasa da paurs chi’d es gnüda transfuormada in üna località per cuors e seminaris.  

Ils ons «jauers» da Johann Feuerstein

L’utuon passà es cumparüda üna gronda publicaziun davart la dinastia da fotografs Feuerstein da l’Engiadina Bassa. Johann Feuerstein, il prüm rapreschantant da la dinastia, ha passantà qualche ons in Val Müstair, in sia patria. Intuorn l’on 1892 vaiva’l perfin installà a Fuldera ün pitschen atelier da fotografia. Our da quist temp s’haja uossa pudü digitalisar e restorar var 50 lavurs. Quellas muossan tanter oter purtrets da persunas singulas o d’interas famiglias, però sainza indicaziuns precisas illas legendas.

Agüd da visitaders

L’exposiziun actuala i’l plan suot da la Chasa Selm realisescha il biograf dals Feuersteins, Ruedi Bruderer. El spera da survgnir uossa grazia a l’exposiziun – preparada in collavuraziun culs Archivs culturals da la Val Müstair e la Fundaziun Pro Clostra Son Jon Müstair – daplü indicaziuns davart las fotografias da Johann Feuerstein. Ils organisaturs da l’exposiziun speran cha visitaduras e visitadurs possan forsa, cun agüd dad agens albums da famiglia, güdar ad identifichar daplü süllas fotografias da la Val Müstair. (cdm/fmr)