Las Latiarnas han sclariu e rebattiu

Il retg tscheiver ei arrivaus definitivamein e s’ignivaus amiez la Surselva: Quei han ins constatau sonda vargada. A Danis han Las Latiarnas organisau ina gronda fiasta giubilara per lur giubileum da 40 onns. Quei che ha entschiet gl’onn 1986 cun ina gruppa da sunaduras e sunadurs ch’ein s’uni per guder communablamein ed embellir il tscheiver, dat ei aunc adina. Era quei han ils massa visitaders dalla fiasta constatau. Trentas giuvnas e giuvens fan part actualmein dallas Latiarnas. Sper Las Patlaunas eis ei ina dallas duas guggas ch’ein activas ella vischnaunca da Breil. La pussonza dil tscheiver ha schizun il traffic stradal stuiu sentir.

Cun bia gust

Pervia dil tscheiver a Danis ei la via da Breil stada interrutta. Naven da Tavanasa tochen sisum il vitg da Danis ha ella s’udiu allas 24 gruppas ch’ein separticipadas al til. Sonda allas 13.15 ei quel semess en moviment a Tavanasa oradem il stradun. Da quei da 600 persunas ein suandadas Las Latiarnas ch’ein idas ordavon. La scola da Danis cun tuttas partiziuns, en tut 170 affons e giuvenils cullas scolettas da Danis e da Breil tochen la scola superiura, ha embelliu essenzialmein ils 40 onns dallas Latiarnas. Cun bia gust han las classas zambergiau lur sujets. Ils numerus aspectaturs agl ur dalla via han viu gruppas costumadas plein colurs e detagls.

Era dus carrs decorai e singulas gruppas pintgas han ils aspectaturs astgau admirar. Quellas han tematisau fatgs e schabetgs locals. L’uniun da dunnas ha rendiu attent allas mesiras da traffic ed ina gruppa pintga las elecziuns communalas digl atun vargau dalla vischnaunca da Breil. Sper las classas dalla scola, l’uniun da dunnas ed il rudi d’affons han era diesch guggas dau suatientscha agl invit dallas Latiarnas da Danis-Tavanasa. Alla fin dil til han Las Fifferlottas, Las Zoclas, Ils Vagabunds, Las Patlaunas, Las Grischalottas e Las Lieurs dau concerts sil plaz-scola ed ella halla plurivalenta. Quellas guggas sursilvanas han quater d’ordeifer cumplettau, numnadamein ils Fetter Sursetters dalla Val Surses, ils Drachafääger da Vättis, ils Nuklear Spränger da Thal e la Schlössligugge da Sogn Gagl.

Da mesanotg, tut anetg

Ed aunc ina gugga cun in num special ein separticipada: Las Latiarnas Oldies. Igl ei ina gruppa da biebein 30 participontas e participonts che eran buca pli sevesi biars onns. Gl’onn 1986 havevan els fundau Las Latiarnas. «Da gievgia grassa entschevevan nus ed ins mava buca pli a letg tochen margis tscheiver da mesanotg», han dus participonts raquintau alla FMR. Per saver guder cumpleinamein il tscheiver prendevien ils biars vacanzas. Ins mavi da til a til, da vitg a vitg, d’ustria ad ustria, senza durmir, ed ins eri beinvegnius dapertut. Margis tscheiver, da mesanotg sin mesjamna dalla tschendra, finevi il barlot denton anetgamein, buca in tun astgavien els pli sunar ed ei mava enquala larma, raquentan gl’um e la dunna che fan part dils «oldies» dallas Latiarnas. «Bia bi havein nus giu cul tscheiver», dian ils dus representants dils fundaturs. Els ein vegni a Danis per schar reviver quels temps. Corsin Steger, in dils commembers dil comite d’organisaziun dallas Latiarnas, conferma ch’il fiug pil tscheiver arda vinavon. In bien team da 40 persunas hagi organisau quei giubileum da 40 onns, puntuescha Corsin Steger.