Dus premis ed ina cristalla

«Nus essan s’entupai oz cheu per undrar ina persuna che ha contonschiu quei che biars siemien, denton che mo paucs contonschan: Nus undrein ina persuna che battiu alla fiasta federala da lutga a Mollis cun curascha, forza, perseveronza e caracter alla testa da nies sport naziunal. Igl ei nies burgheis e retg da lutga Armon Orlik.» Aschia ha il president communal da Mustér René Epp introduciu sia undrientscha venderdis vargau. Ell’emprema retscha haveva il honorau priu plaz ensemen cun ses geniturs Helena e Paul Orlik.

16 liungas minutas

Ei detti muments ella cronica d’in vitg, d’ina regiun e d’in cantun, gie schizun d’ina tiara, ch’ins emblidi buc. Quei seigi stau la dumengia dils 31 d’uost 2025. Ell’arena a Mollis, avon la culissa da 60 000 aspectaturs ed aspectaturas ed ell’otgavla runda, ha il finalist Armon Orlik tschappau siu adversari Pirmin Reichmuth e fiers el plat ella reisgiadira. Diesch puncts ha el gudignau per quella prestaziun. Lu, ella lutga finala, ha el denton stuiu spitgar – 16 liungas minutas. La pli davosa runda han dus collegas dad Armon Orlik, Samuel Giger e Werner Schlegel contonschiu. Senza ch’ins hagi mess en dies l’auter ein quellas 16 minutas idas a fin. In pari – ed il retg niev che spitgava ha astgau giubilar.

Armon Orlik ei vegnius encorunaus sco emprem retg da lutga dalla Svizra orientala suenter 18 onns. Gl’emprem retg che deriva dil Grischun. «E lu era aunc in burgheis da Mustér», ha René Epp detg en siu plaid. El ha puntuau las fermezias e ludau las qualitads dil retg dalla resgiadira. «Malgrad gronds success ei Armon Orlik adina restaus in sempel.» El seigi in exempel per la giuventetgna, in che muossi che prestaziun e caracter s’audien ensemen. Alla fin da sia undrientscha ha il president communal surdau al retg da lutga 2026 ina cristalla dalla vischnaunca da Mustér, quella dueigi regurdar el adina a sias ragischs.

Adina fetg bugen a Mustér

Gl’undrau ei ius al microfon ed ha priu il plaid. El ha raquintau ch’el vegnevi adina bugen tier tatta e tat a Disla. Cul tat mavien els bugen spel Rein. Era mavi la famiglia era regularmein sil Lag la Tuma a far bogn. «Quei era in ritual, quei liug ei dil reminent in dils pli bials loghens da forza per mei. Nus vegnin adina fetg bugen a Mustér. Pertgei nus sentin era che nus Orliks essan beinvegni cheu», ha Armon Orlik confidau agl auditori.

Duas gruppas musicalas ed in solist han embelliu la surdada dil premi Desertina. Inagada ils Galiots cun Flavio Huonder, Fabian Huonder e Josef Sgier. Lu la formaziun Cantus Avis sut la direcziun da Rilana Cadruvi. Laurin Bucheli, in buob dad 11 onns da Segnes, ha sunau plirs tocs sigl orghelin svizzer. Quellas diversas contribuziuns musicalas han accentuau la festivitad ella halla Cons.

Premi per Simon Camartin …

Auter che la cumissiun e la suprastonza communala saveva negin tgi che retscheivi uonn il premi da renconuschientscha e quel da promoziun. Biaras convischinas e convischins ein vegni pervia dall’undrientscha dad Armon Orlik. Aschia era Simon ed Oana Camartin. Il president communal René Epp ha supplicau sin tribuna il laudatur Giusep Giuanin Decurtins. Lez ha gleiti revelau il legn. En siu plaid ha el enumerau ils merets e la prestaziun da Simon Camartin (mira intervesta). Avon 40 onns, alla fiasta cantunala da cant a Scuol, dirigeva el il Chor viril baselgia da Mustér. Suenter la surdada dil premi da renconuschientscha agl undrau ha lez sincerau: «Sch’jeu havess saviu tgei che spetga, havess jeu mess si cravatta.» Mirond giu el publicum ha el manegiau: «Biars auters giu cheu el publicum havessen meritau quei premi dapli che jeu. Igl ei biars che prestan onns ora lavur el zuppau. In premi meretan era tut quels che stattan en per la verdad en nies mund zanistrau.»

… e l’Uniun da dunnas Mustér

Ellas retschas dils presents havevan era commembras dall’Uniun da dunnas da Mustér priu plaz. Sco quei che la geraua da cultura Iris Lombris ha detg, haveva la suprastonza communala envidau la suprastonza e tuttas presidentas anteriuras da quell’uniun. Sco ella ha saviu da dir, ha era Irma Camartin, la mumma da Simon Camartin, presidiau quella avon onns. L’Uniun da dunnas da Mustér presta bia lavur communizeivla e publica, voluntaria ed el zuppau. Ella exista dapi haheias. Sin proposta dalla cumissiun ha la suprastonza communala surdau a quella il premi da promoziun Desertina 2026. Las treis suprastontas Aurelia Albin, Leslie Flury ed Ursina Huonder han representau l’entira uniun activa cun sias 220 commembras e 60 che separticipeschan allas radunonzas generalas. Madleine Deflorin ha fatg la laudatio per quell’impurtonta uniun dil vitg.