«Duos medaglias n’haja fingià – uschea cha’l böt es cler»

I sun «agreabels» minus ses grads sper la plazza da trar a tschoccas a Sur En, Sent. «Nus vain gnü sairas fingià blerun plü fraidas, cun minus dudesch e perfin minus 20 grads», ria üna mezza dunzaina da commembers dal club da tschoccas «ES Sur En», dürant ün dals ultims trenamaints cuort avant las maestranzas svizras da trar a tschoccas a Scuol. Da la partida es eir Claudio Mathieu (38) da Ramosch, chi fa güsta pront, a moda rutinada, sia tschocca a l’ur da la plazza da gö. «Per s-chodar aint mettaina sü il prüm üna jada üna platta blaua, la plana», declera’l in tuotta calma, «per verer quant svelt cha’l glatsch es!»

Trar a tschoccas – ün sport da precisiun

Il sport da trar a tschoccas es in fuond ün gö fich simil al sport da curling o lura al gö da boccia. Eir quia nu dependa insè da la forza, dimpersè ouravant tuot da la precisiun. Oter però co pro’l curling o pro boccia es il böt da mincha tiratschoccas: trar la tschocca, scha pussibel, adüna culla listessa fermezza. Avant mincha cuolp e tuot tenor che chi’s less giovar, vegnan scrauvgiadas differentas plattas da gomma in diversas culurs vi da la part suot da la tschocca per ch’ella sglischa, cun daplü o minchatant cun damain success, sur il glatsch via. La platta blaua es la platta la plü plana – la verda, la plü svelta. Implü dependa la lunghezza eir amo dad ulteriurs facturs, sco per exaimpel la temperatura, il sulai e quant ferm cha’l glatsch es gnü dovrà.

Co cha tuot ha cumanzà

Intant s’han tuot ils giovaders s-chodats aint a Sur En e sun pronts. «Giovaina trais cunter trais?», dumonda ün dals pluoders e cumainza a trar la büs-cha. Svelt sun las duos squadras missas insembel ed i ha nom «Dai!» – il gö da trenamaint po cumanzar. Claudio Mathieu surpiglia a moda modesta il cumond da sia squadra, uschea sco ch’el ha fat quai fingià dürant indombrablas sairas avant.

Fingià daspö cha’l club da trar a tschoccas «ES Sur En» es gnü fundà dal 2011 es Claudio Mathieu nempe cun grond ingaschamaint da la partida e tocca intant pro’ls meglders tiratschoccas in Svizra. «Cumanzà ha tuot però dürant il temp da scoula, in quarta o tschinchavla classa», as regorda Claudio Mathieu, chi’d es specialist da geotermica e chi maina insembel cun sia famiglia ün affar da sondaschas a Ramosch. «Nos magister da quella jada d’eira fich sportiv e cun el eschna its üna jada a giovar.» Quai es stat il cuolp da partenza per sia carriera: Il prüm cun üna squadra da scolars – Ils Juniors – dürant il temp da scoula, giovond pitschens turniers regiunals sainza grondas ambiziuns. Davo üna posa plü lunga ha’l lura però giovà tant plü intensiv, lura cul club a Sur En, as partecipond cun grond success a turniers regiunals, surregiunals, naziunals ed internaziunals, fin al di dad hoz.

Champiun, vicechampiun e vice-vicechampiun

Il sport da trar a tschoccas es dvantà per Claudio Mathieu i’l fratemp dimena bler daplü co be ün passatemp. «Trar a tschoccas es üna gronda paschiun per mai ed ün sport chi’m fa ourdvart plaschair, impustüt scha la tschocca riva eir precis là ingio ch’ella stuvess rivar», straglüscha il Ramoschan, «e schi’s po guadagnar lapro amo medaglias e titels naziunals ed internaziunals, schi es la satisfacziun natüralmaing tant plü gronda.»

Champiun svizzer (2024) e vicechampiun svizzer (2025) da trar a tschoccas illa concurrenza da mirar singul e duos medaglias da bruonz, üna dal 2024 al champiunadi europeic illa concurrenza da mirar in gruppa e tschella dal 2025 al champiunadi mundial illa concurrenza da gruppa, quai sun stats ils plü gronds success illa carriera da Claudio Mathieu. Eir scha minchüna da quistas medaglias e titels til es important, dad üna es el pustüt superbi: «Pudair guadagnar üna medaglia als champiunadis mundials, quai es simplamaing stat üna gronda sensaziun.» Sün üna tala medaglia – illa disciplina da mirar in gruppa, chi vain resguardada i’l muond da trar tschoccas sco la disciplina rojala – ha la squadra svizra nempe spettà fingià sur 30 ons. Ils Austriacs sajan nempe ils plü ferms, davo ils Tudais-chs e Talians, e lura cumbattan pel solit ils Svizzers insembel culs Tschecs per la quarta o tschinchavla plazza. E precis üna victoria cunter ils Austriacs haja dovrà per insomma avair üna medaglia a la sgüra dal 2025. «Be evitar da perder trenta a nolla, dschaivan nus ün a tschel, simplamaing provar da tegner cunter almain ün zich. E lura vaina guadagnà e güsta cunter ils meglders. Quai capita infra desch gös be üna jada.»

Terza medaglia in mera

Inavo pro’l gö da trenamaint a Sur En: «Ma che fast? Quella es blerun massa lunga! Tü varast dal sgür sü la platta sbagliada», as doda a plondscher surriond. Mincha tratta vain discusa manüdamaing da Claudio Mathieu e seis collegas da club. Tals trenamaints sajan indispensabels per pudair mantegner üna buna fuorma e per as pudair preparar optimalmaing sün gös da maestranza, impustüt scha quellas maestranzas sun be güsta davant porta d’chasa. «Pel mumaint nu suna amo nervus, quai vain amo. Il special da quista maestranza es però sgüra cha nus eschan il club ospitant ed uschea intretschats magara plü ferm in chosas organisatoricas e main sportivas.» Tegner il focus sarà per quistas maestranzas a Scuol dimena dal sgür amo plü decisiv co pro otras maestranzas in oters lös. «Ils ultims duos ons n’haja fat üna medaglia, uschea cha’l böt es cler. Schi grataja lura o nöglia, quai es tuot alch oter.»

Claudio Mathieu es pront, tant per üna terza medaglia pro maestranzas svizras, sco eir per ün bun punsch davo il trenamaint. «Chi da vus ha said?» vain dumandà illa ronda. Tuots chi dan dal cheu bandunond il glatsch. Chi es culs impissamaints vi da programs accumpagnants, tablas chi ston amo gnir montadas e tapets plazzats al dret lö, e chi vi da lunghezzas, cuolps e plattas blauas infin verdas.