Per la fitness duvrass ei veramein in forum

La destinaziun turistica Flem Laax Falera ei amiez la stagiun d’unviern 2025/26. Malgrad la scartezia da neiv ei la bilanza d’entochen ussa buna. Denter Nadal e Daniev ei habitaziuns, hotels ed albierts stai occupai ed en tuts treis loghens ha l’economia negin motiv da tugnar. La davosa fin d’jamna ha l’occurrenza Laax Open accellerau il renum da Laax sigl entir mund. Laax ei daveras ina marca prestigiusa che attrai glieud da tut ils continents. Quella publicitad vala aur per la regiun. La marca «Laax» carmala dil reminent ils turists buca mo en quella vischnaunca. Falera e Flem ein inclus automaticamein. Ed era ils vitgs vischinonts.

En auters vitgs dalla Surselva eis ei pli ruasseivel. Ella vischnaunca da Laax muossan tuts paliats ensi. La noziun «cefras cotschnas» enconusch’ins buca, ei va semplamein ensi. E quei cun in pei da taglia da 40 %. Autras vischnauncas havessen motiv dad esser scuidas. Ellas ston strihar quella e tschella investiziun urgenta, lur finanzas lubeschan buca gronds segls. Ed a Laax? Ins pudess s’immaginar che quella vischnaunca ei schi grassa ch’ella schloppa gleiti. Ella ha saviu investir ils davos diesch onns varga 80 milliuns francs. Tut sa ella finanziar ed amortisar cuntinuadamein.

Las finanzas fan pilver negins quitaus e Laax sto era buca haver starment da piarder habitonts. Anzi, ella sto bunamein haver starment da crescher aunc pli ferm. La mobilisaziun da terren da baghegiar sforza per exempel leutier. Quei han ins era udiu alla discussiun ch’ei stada sonda sera ella Cularta. Pli gronda e grassa che la vischnaunca vegn, e pli urgent vegn ei da far ina cura. Il prighel da malsognas crescha numnadamein. In tec fitness fagess buca donn.

Ils da Laax sedamondan forsa co quei duess esser manegiau culla cura da fitness. Per promover la fitness, la vitalitad ed il moviment, duess’ins veramein suandar gl’impuls ch’ins ha udiu ella Cularta. Ina vischnaunca che crescha da tala maniera, che vegn pli e pli anonima, cun indigens che sesentan pli e pli sco minoritad, cun traffic privat e public senza fin, cun communicaziun e contacts che sespiardan, cun uniuns che pigiureschan, nua ch’il slontsch dalla cuminonza va a digren, nungir il romontsch: Ei duvrass veramein in forum per discutar tals sintoms da malsognas. La vischnaunca grassa che crescha, pitescha numnadamein a liunga vesta. Quei forum, quei organ da discussiun publica, contribuess d’anflar recepts, da tener Laax fitta e vitala, da mantener siu slontsch.