Cun nulla promil tras il schaner

Jau na crai betg dad esser in da las modas. Jau sun plitost plaun, sch’i va per siglir sin in trend. Ma sin in trenin sun jau ussa siglì si. Schegea che quai è capità per spira casualitad: il «Dry January», il mais da schaner senza in sulet schluc alcohol.

In’anteriura collega da lavur da la FMR aveva (ed ha anc adina!) in partenari da l’Engalterra. Ed en Engalterra è «Dry January» daventà in ritual fitg popular, suenter ch’il stadi aveva propagà l’onn 2014 da viver abstinent (silmain) durant il mais da schaner. Insumma, nossa collega ha raquintà tar ina pausa da café durant il temp d’advent che ses partenari ed ella na baivian betg pli alcohol a partir da Silvester. Nulla promil durant in mais.

L’emprim mument ma pareva quai in’idea strana. In tipic trend, ina moda, ina challenge per in e mintgina sut l’ensaina da l’optimaziun persunala. Ma lura hai jau ma dà in stausch. E dapi trais onns è «Dry January» era daventà mes ritual durant il schaner. Igl è mintga giada ina scumessa cun mamez, in pitschen test che fa smirvegliar quant ferm che l’alcohol (ina droga!) ha infiltrà noss mintgadi. Mintga tschaina, mintga vernissascha, mintga success, mintga sconfitta, mintga apero vegn cumbinà cun vin u biera. Sch’igl è da far viva durant il schaner, lura hai jau adina mia stgisa: «Dry January». E blera glieud guarda lura da quai sceptic, sche jau veglia ussa far da missiunari per la Crusch blaua ed als persvader dad era desister …

Insumma betg, jau vuless simplamain baiver durant in mais autra rauba. I dat en il fratemp bleras bunas bavrondas «senza». Ma surtut èsi in gieu interessant ch’i vala la paina da testar. Jau poss garantir, il magiel vin durant il favrer gusta tut auter.