«Buns resuns e collaboraziun motiveschan mei»

L’idea d’ina concurrenza da turas sisum la Surselva ei pli che 20 onns veglia. E sch’ella fuss vegnida realisada tenor il concept da Pius Condrau permiert, s’udess ella oz tier las extremas insumma. «Sia finamira era ina tura cumparegliabla culla Patrouille des Glaciers el cantun Valleis», seregorda Giochen Bearth che presidiescha la Trofea Péz Ault a Mustér dapi igl onn 2018.

Da Breil sill’Alpsu

Pius Condrau ch’ei staus iniziant dil territori da skis a Mustér e sez era in skiunz fetg passiunau, veva skizzau la lingia per ina tura da skis da Breil sur Durschin, territori dil Péz Russein/Tödi entochen sill’Alpsu. Skiunzas e skiunzs havessen giu da surmuntar in territori pretensius. «Quei fuss secapescha stau ina concurrenza spectaculara ed extrema», di Giochen Bearth ch’ei savens da viadi culs skis els cuolms en siu temps liber. Quella tura ault alpina ei restada silla skizza mo ha senz’auter dau igl impuls per in’autra tura el contuorn dil territori da skis a Mustér: La Trofea Péz Ault. Il concept per quella ei vegnius scaffius avon prest 20 onns dil comité d’organisaziun cun Leo Condrau alla testa. El ei secumprovaus ed uonn sa la trofea vegnir purschida per la 15avla ga. Ella ha liug la fin d’jamna dils 14 e 15 da mars. La trofea porscha turas cun differenzas d’altezia d’entochen 1600 meters.

Mintg’onn ina sfida

Per ch’ina concurrenza da turas da skis sappi vegnir organisada eis ella dependenta da plirs facturs, surtut da neiv ed aura che lubescha in tal arranschament. Mo lu pretenda l’organisaziun era glieud qualificada ed in tschuppel voluntaris. Tschun onns ei Giochen Bearth separticipaus alla Trofea Péz Ault avon che surprender la funcziun da meinacuorsa e la fin finala il tgamun dil comité d’organisaziun igl onn 2018. «Mei motiveschan ils buns resuns mintgamai suenter las cuorsas. Da quels dat ei en abundonza ton dils concurrents licenziai sco ils populars e quei da tuttas cundiziuns,» di Giochen Bearth ch’ei dil reminent cau digl Uffeci cantunal per la segirtad da victualias e sanadad dils animals dil Grischun.

Cun tgierp ed olma

Mo lu numna Giochen Bearth era la glieud ch’ei necessaria per ch’ina tala concurrenza seigi insumma pusseivla, abstrahau dallas cundiziuns meteorologicas: «Las preparativas cul comité d’organisaziun, la collaboraziun culla colonna d’agid ed ils voluntaris. Il punct culminont da quella collaboraziun ei per mei adina la dumengia endamaun dalla cuorsa principala cu nus serimnein allas 05.30 a Caischavedra», accentuescha Giochen Bearth. Rodund 70 persunas s’engaschien cun tgierp ed olma e garanteschien aschia la segirtad ed in bien decuors dalla concurrenza.

Ils populars el center

Ina dallas grondas finamiras dils organisaturs dalla Trofea Péz Ault da quest onn ei da migliurar la communicaziun. Pil marketing ei Giulia Muoth responsabla, ella remplazza Barbara Bieger ch’ei seretratga da quella funcziun. «Nus lein esser pli presents, era ellas medias socialas. En quei connex lein nus plidentar surtut quellas e quels che fan turas da skis senza vuler concurrenzar. La Trofea Péz Ault duei esser in arranschament per mintgina e mintgin da quei sport d’unviern», di Giochen Bearth. Il giubileum da 15 onns seigi in bien mument per far in sforz ella communicaziun. La rangaziun dallas categorias dils populars duei buca sedrizzar tenor il temps dils pli sperts: «Quellas e quels ein las victuras ed ils victurs che vegnan il pli datier dil temps da media. Aschia ha mintgina e mintgin la schanza da gudignar en sia categoria.»

250 participontas e participonts

Giochen Bearth e siu team dall’organisaziun spetgan rodund 250 participontas e participonts, igl onn vargau eran rodund 200 stai alla partenza. Pils licenziai e giuvenils quenta la Trofea Péz Ault era uonn pil Swiss Cup. Las cundiziuns actualas cun pauca neiv el territori da skis da Mustér fan buca quitaus al president dil comité d’organisaziun: «Ei va aunc dus meins entochen tier la trofea. Onns cun pauca neiv havein nus adina puspei giu.»