Ulteriour Surmiran pigl cunsegl d’administraziun

L’Ovra hidraulica «Albula-Landwasser Kraftwerke AG» cun sez a Filisour exista gio siva digl 1961. Siva digl 1967 teira igl travagl a nez l’ava dall’Alvra e dalla Landwasser e magna treis ovras hidraulicas a Filisour, Barvogn e Casti. L’ovra a Filisour è neida surdada agl menaschi igl 1967 e l’ovra a Casti igl 1989. L’acziunaria principala è stada blers onns la Societad electrica Laufenburg cun ena part da 75 % dallas aczias. Chellas 75 % ò alloura surpiglia l’Axpo ed è ossa damai l’acziunaria gronda. Las Ovras electricas Tavo on 15,74 % dallas aczias e chellas aczias digl cantun Grischun schean tar 5 %. Igls cumegns Albula/Alvra, Barvogn Filisour e Farrera on an tot 4,26 % dallas aczias.

Energeia per radond 95 000 casadas

La producziun d’energeia annuala dall’Ovra hidraulica «Albula-Landwasser Kraftwerke AG» schea tar 374 milliuns kilowatts, damai ena bela somma per ovras hidraulicas pi pitschnas. Chella somma a kilowatts corresponda ad energeia per radond 95 000 casadas per onn. A Filisour ed a Casti segnan mintgamai dus turbinas universalas per la producziun dall’energeia. Igls davos onns ò la societad acziunaria adegna puspe moderniso ed er actualiso las ovras a Filisour, Casti e Barvogn. Igl travagl porscha 13 plazzas cumplagnas. Occupadas èn chellas er da plessas persungas indigenas.

Fabio Luzio per Ulrich Bleiker

Igls davos onns ò Ulrich Bleiker, igl anteriour president digl Cunsegl grond e sesent a Rothenbrunnen, represchento igl cantun Grischun aint igl cunsegl d’administraziun dall’Ovra hidraulica «Albula-Landwasser Kraftwerke AG». El è sa retratg da chel mandat administrativ, uscheia tgi la Regenza ò gia da cattar en successour. Catto chel successour ò la Regenza cun eliger Fabio Luzio, igl deputo da Cunter. Damai è igl electroinschignier la nova persunga tgi represchainta igl cantun Grischun aint igl cunsegl d’administraziun dall’Ovra hidraulica «Albula-Landwasser Kraftwerke AG». Anvers la FMR ò Fabio Luzio menziuno d’esser onoro da pudeir represchentar igl cantun Grischun ainten chel gremi administrativ.

Agl cunsegl d’administrativ appartignan nov persungas. Fabio Luzio è alloura betg igl unic Surmiran tgi fò part a chel. Er commembers digl cunsegl d’administraziun dall’Ovra hidraulica «Albula-Landwasser Kraftwerke AG» èn Andy Kollegger, vicepresident d’Alvagni, Felix Schutz e Luzi C. Schutz da Filisour. President è Jörg Huwyler da Sarnen. Gl’onn passo ò la societad acziunaria fatg en stgamgiamaint da 16,2 milliuns francs (cunzont antradas davart digls cumegns-partenaris per l’energeia retratga). Alla fegn è rasto en gudogn da 695 000 francs. Agls partenaris èn neidas restitueidas dividendas da 3 %.