Üna gronda persunalità dal teater ha dit adieu

Culla mort da Lela (Eldscha) Kamm-Mayer (1939 – 2026) banduna üna persunalità il muond dal teater popular. La teatrista ed impustüt redschissura da Scuol d’eira cuntschainta bainquant sur ils cunfins teatrals da l’Engiadina Bassa oura. L’eivna passada, ils 15 schner 2026, es Lela Kamm-Mayer morta ill’età dad 86 ons. Quai ha sia famiglia fat a savair in sonda in ün’annunzcha da mort illa Posta Ladina. Lela Kamm-Mayer es creschüda sü a Vnà, ha davo la scoula populara imprais il manster da secretaria e d’eira mamma da trais uffants.

Üna vita pel teater

La duonna chi ha fundà dal 1986 la gruppa da teater Scuol, resta in memoria a bleras e blers i’l muond dal teater popular impustüt sco persunalità fich creativa, sensibla, vivais-cha e plain temperamaint chi ha vivü plainamaing, impustüt eir pel teater popular.

Sper esser statta presidenta da la gruppa da teater Scuol per raduond 20 ons e sper avair eir giovà svessa a teater a Scuol, d’eira la plü gronda paschiun da Lela Kamm-Mayer il far redschia. In quista funcziun nun ha ella be tradüt divers tocs da teater dürant tuot sia carriera, dimpersè eir pudü realisar indombrablas producziuns a Scuol ed utrò. Sco per exaimpel illa Chasa Fliana a Lavin i’l rom da la scoula da pauras, ingio cha Lela Kamm-Mayer ha manà dürant decennis e conscienziusamaing cuors da teater.