«In mund sutsu» a Trun

«Nus essan ussa sin buna via», di Reto Pfister. El presidiescha il comite d’organisaziun ch’ei vidlunder dapi gl’atun vargau da preparar il project «Mund sutsu». El center ei buca nies mund ch’ei sutsura cun tut ses conflicts e geopolitica. La Scola da cant Surselva cun ses 80 affons e giuvenils ei vidlunder d’exercitar in’aventura musicala per grond e pign. «Per nies giubileum havein nus mess sin tribuna ina nova historia cun nova musica. Nus essan cun nos 20 onns vegni maiorens ed en certs graus era carschi», scriva Rilana Cadruvi Scherrer, la meinaproject da quei ch’igl auditori astga spitgar proximamein.

Massa fantasia, cant ed effects

Il matg 2016 ha la Scola da cant Surselva – lu aunc cul num Chor d’affons Surselva – presentau l’emprema gada in giug musical pli grond. Per festivar ils 10 onns haveva la dirigenta iniziau lu ina inscenaziun cul tetel «D’in affon che viveva sin ina plonta». Il chor haveva presentau 13 cumposiziuns da Flavio Bundi cun texts da Roman Weishaupt. La producziun da lu ha muentau, divertiu e svegliau emoziuns. Il scenograf Remo Arpagaus ha contribuiu e Marina Blumenthal perschuadiu en ina rolla centrala sin ina tribuna cun massa fantasia, effects e naturalmein il cant dils affons.

Suenter quei punct culminont ha la historia dil Chor d’affons Surselva cuntinuau. Gl’onn 2019 eis el semess sut il tetg dalla Scola da musica Surselva e priu il num «Scola da cant Surselva». Cun Judit Scherrer ha Rilana Cadruvi astgau beneventar ina pedagoga che ha rinforzau las structuras e susteniu essenzialmein il svilup dil chor.

Musica da Lorenz Dangel

Actualmein exerciteschan 80 affons in giug musical niev. Els contan en quater gruppas da vegliadetgna, mintgina porta il num d’in utschi: ils pigns ein ils paslers, ils affons dalla 1.-2. classa ils masets, quels dalla 3.-5. classa las lodolas ed ils gronds las luscheinas. Quellas quater gruppas s’uneschan el giug musical giubilar «Mund sutsu». Il publicum astga puspei selegrar d’in spitachel plein fantasia e colurs.

Il famus cumponist tudestg Lorenz Dangel ha scret la musica, David Flepp e Susan Rupp ein ils auturs dil libret. San els tradir da tgei ch’il cuntegn tracta? «Igl ei ina barculada narra, ella quala realitad e ficziun semischeidan», remarca David Flepp el carnet accumpignont dil giug musical. Ins dueigi s’immaginar la situaziun d’ina persuna che sesanfla tut persula sin ina barca amiez la mar, plein undas e da stgirenta notg. Plein anguoscha sa ella buca tgei far. Sut la persuna ei nuot auter ch’ina mar plein creatiras, sur ella il tschiel stelliu.

La muetta tschatschra

Co il viadi cuntinuescha e co el finescha vul negin tradir. «Ins duei vegnir sez ed emprender d’enconuscher la muetta tschatschra che seporscha da salvar la persuna. Cul maletg da tribuna dat Annadora Friberg in vestgiu animont ed inspiront all’inscenaziun «Mund sutsu». In ensemble dad otg musicists sut la direcziun da Clau Scherrer accumpogna il giug. Per las ideas dils costums ei Remo Arpagaus responsabels.