Glisch verda per Brinzauls
A partir da glindesdi vala la fasa verda a Brinzauls. Quai vul dir ch’il scumond d’access al vitg vegn abolì e che l’evacuaziun prenda suenter 62 emnas puspè ina fin. Sco che Christian Gartmann dal stab directiv communal ha ditg envers la FMR, na saja proximamain betg da quintar cun ulteriuras evacuaziuns. I saja uschè calm sco dapi onns betg pli.
«La situaziun a Brinzauls è sa calmada.» Questa frasa han ins adina puspè legì en l’ina u l’autra furma durant las ultimas emnas. Ch’igl è effectivamain uschia conferma uss era la decisiun dal stab directiv da la vischnanca Albula/Alvra. A partir dad oz venderdi a las 9.00 vala la fasa oranscha a Brinzauls, quai vul dir ch’abitantas ed abitants pon puspè pernottar en lur chasas. Per la publicitad resta dentant il scumond d’access fin glindesdi a las 6.00, sco ch’ins po leger en il 127avel bulletin d’infurmaziun. A partir d’alura vala numnadamain la fasa verda (guarda box). La segunda evacuaziun da Brinzauls ed il scumond d’access fineschan pia suenter 62 emnas. Pervia dal privel da crudada da crappa e stgaglias resta be ina zona sisur il vitg serrada (guarda carta).
«Dapi onns betg pli uschè calm»
Che Brinzauls vegnia proximamain puspè evacuà, quai na saja en pli betg da temair, uschia Christian Gartmann envers la FMR: «Quai è pauc probabel tenor las valitaziuns actualas. Il privel per il vitg nà dal culm è numnadamain sa schlià la fin da november 2025, vul dir la grava sisur il vitg. Cun la crudada da l’uschenumnà Plateau Ost è il material da la grava sa stuschà e betg pli avunda taiss per smanatschar il vitg. Che la grava stat quasi salda, conferma quai.»
Las ultimas emnas n’han ins dentant betg mo constatà ch’il privel nà dal culm è tschessà. Er en general è la situaziun sa megliurada considerablamain, sco ch’il responsabel per la communicaziun dal stab directiv ha confermà vinavant: «I n’è dapi onns betg pli uschè calm.»
Las translocaziuns restan in tema
Malgrà las bunas prognosas restan entant las translocaziuns preventivas in tema. Sco che Christian Gartmann ha explitgà, na midia la glisch verda per Brinzauls nagut ord vista uffiziala: «Nus, vul dir ils responsabels da la vischnanca e dal Chantun, cuntinuain cun la lavur per las translocaziuns preventivas tenor las cundiziuns stabilidas. Da quella vart na datti nagina retratga.»
Pussibel saja dentant ch’abitantas ed abitants pondereschian anc ina giada lur decisiuns. «La nova situaziun po sa chapescha avair in effect e forsa ch’inqual abitant u abitanta mida opiniun. Ch’i n’è betg da spetgar ulteriuras evacuaziun ils proxims onns vegn en quest connex franc a dar speranza. «Tge svilups ch’i dat durant decennis, quai è dentant grev da dir», ha il responsabel per la communicaziun ditg ed agiuntà: «Igl è sa chapescha anc adina ina dumonda emoziunala ed insumma grev da bandunar ses dachasa per adina.»
La saira d’infurmaziun
Davart las translocaziuns preventivas, la situaziun geologica, la gallaria da drenascha ed ils proxims svilups infurmescha la vischnanca pli en detagl ils 5 da favrer 2026. La saira d’infurmaziun publica cumenza a las 19.00 ed ha lieu en la chasa da scola Cumpogna a Casti. Ella vegn era transmessa en directa online.
Da cotschen tar verdsur la fin d’emna
Dapi oz venderdi a las 9.00 fin glindesdi a las 6.00 vala la fasa oranscha a Brinzauls. Durant questa perioda preparan las autoritads la fin da l’evacuaziun, sco ch’ins po leger en il 127avel bulletin da la vischnanca Albula/Alvra. Access a Brinzauls han sur fin d’emna entant be las abitantas ed ils abitants. Els pon acceder al vitg via ils puncts da controlla da Vazarouls e Belfort ed era pernottar en lur chasas.
Cun la fasa verda vegn Brinzauls alura puspè ad esser accessibel a mintgin e mintgina, dentant be sin la Via da Brinzauls nà da Surava/Alvagni. Per manischar sin la via d’access tranter Vazarouls e Brinzauls dovri entant ina vignetta ch’ins po dumandar a partir dals 6 da favrer 2026 tar la vischnanca. Per il traffic general saja quella via però memia stretga e restia damai serrada per la publicitad er en l’avegnir. En pli mainia la lingia d’autos da posta 183 a partir da glindesdi era puspè tras Brinzauls. (vit/fmr)
Gust da leger dapli?