Attacha da hackers pro la Viafier retica

In ün e-mail dals 21 schner 2026 ha la Viafier retica rendü attent a sia cliantella cha hackers hajan attachà il sistem da bigliets online pel tunnel dal Vereina. Persunas sainza autorisaziun hajan gnü access a datas persunalas, sco per exaimpel noms d’ütilisaders, pleds clav, noms e prenoms, adressas dad e-mail ed adressas postalas.

Pertoc es be il sistem pro’l Vereina

Ch’actualmaing nu detta ingüns indizis cha eir oters sistems sajan pertocs da quist’attacha, scriva Yvonne Dünser, pledadra da medias da la Viafier retica sün dumonda da la FMR. «La Viafier retica ha subit – davo cha l’intop da sgürezza es gnü scuvert e cun agüd dad experts externs – cumanzà a sgürar tuot seis sistems e sia infrastructura.» Ch’implü hajan els fat ün’annunzcha in chosa pro las instanzas federalas e portà plont pro las autoritats chantunalas e federalas.

Plünavant nun ha la Viafier retica tenor la pledadra da medias neir gnü ingünas indicaziuns cha cun las datas involadas füss gnü fat maladöver. Intant sensibilisescha la Retica però: «Nus supplichain a nossa cliantella dad esser attenta i’l decuors dal prossem temp cun telefonats ed e-mails suspettus e da na dar inavant infuormaziuns obain datas persunalas a persunas chi pretendan da lavurar per la Viafier retica.» Implü vain eir cusglià dad actualisar pleds clav sün oters portals electronics, scha quels sajan identics culs pleds clav sülla plattafuorma da lur sistem da bigliets online pel tunnel dal Vereina.

Sistem per ün mais our d’funcziun

Quel sistem da bigliets online nun es dal rest intant accessibel, e fin ch’el pudarà darcheu gnir miss in funcziun düraraja almain trais fin quatter eivnas, uschea Yvonne Dünser invers la FMR: «Nus sperain cha’l sistem da bigliets online pro’l tunnel dal Vereina funcziuna darcheu fin la fin da favrer.» Fin a quel mumaint dovraraja ün zich pazienza, perche cha bigliets per ir tras il Vereina pon gnir retrats dürant quel temp be directamaing pro las chaschas a Selfranga ed a Sagliains.