Viadi sainza bigliet

En avantmezde chiet a Coira, gl’è dumengia. Igl bus nomer quatter sa ferma alla farmada Waldhaus e treis donnas corran notiers. Egna dad ellas – ella è blonda e vistgeida da buna maniera – mossa agl chauffeur ena carta da prepaid pigl bus: «Nous treis faschagn en’excursiun e duvragn en bigliet. Els ans on do chegl cò.» Igl chauffeur tgapescha tgi las treis donnas reivan dalla clinica psichiatrica. Treis paziaintas zont differentas cun en plan communabel ed ena carta da prepaid.

Igl chauffeur las geida da far igl bigliet. Igl apparat aint igl bus è en pò cumplitgia. Sen la carta da prepaid ògl pero betg avonda daners per treis bigliets. Igl madem vala per la carta da banca dalla donna blonda e paer bar è gio en’urela betg ple pussebel aint igl bus. Tge far?  – Igl chauffeur amprova da far igls bigliets otraveisa, da cumbinar igl dabung dalla carta da prepaid cun chels pêr francs rastos sen igl conto dalla blonda, ma igl apparat vot saveir navot da chest cumpromiss. Ossa varda el sen l’oura – gio treis minutas e trenta secundas retard – e dei allas donnas da sa tschantar, tgi ellas duessan neir eneda anfignen alla staziun.

Durant igl viadi alla staziun spera igl chauffeur tgi chels dalla controlla reivan betg. Las treis donnas survagnissan en castei ed el en marmogn digl schef. Ansasez vess el stuia deir tgi uscheia na possan ellas betg neir cugl bus. Ma el leva betg frenar igl entusiassem dallas treis donnas tranter igls trenta e tschuncanta. La veta varo managea betg angal bagn cun ellas. La blonda è ena donna fegna, la sia vistgadeira lascha sminar tgi ella less far tot andretg. La sagonda ò tgavels neirs curts ed ena vousch raca tgi rachinta da bleras cigarettas fimadas e forsa er dad otras substanzas. E la terza donna è vistgeida da moda e maniera fitg simpla, fatscha asiatica, forsa da Sri Lanka? – Cun tge demunis on ellas da cumbatter? E tge viadi fon ellas oz?

«Nous giagn angal anfignen alla staziun», cloma chella dalla vousch raca anvers igl chauffeur cura tgi reivan alla staziun. Ed ellas bandungan igl bus da bunga luna. Lez cuntinuescha la sia ronda aint en oter quartier digl martgea ed è bung diesch minutas pi tard anavos. Er igl trio insolit è puspe cò. Dus dad ellas cun ena cigaretta an bucca, la terza en pachet da seis Coca-Colas ainta mang. Ellas reian, steidan las cigarettas ed aintran, mattagn anc adegna sainza bigliet. Chella dalla vousch raca mossa igl polesch anse ed igl chauffeur las sainta a baterlar a dascous noua tgi pudessan zuppar la roba. El surrei e suppona tgi ellas on cumpro ena clocca whisky aint igl Pronto. Ni schizont dus?

Igl viadi anavos alla farmada Waldhaus cozza angal en pêr minutas. Igl chauffeur è led, cura tg’el è lò. Chels dalla controlla èn betg sa fatgs vaseir. Las treis donnas igl saleidan legramaintg e bandungan igl bus. Lour viadi alla staziun saro betg aint igl senn dalla terapia ordinada da lour psichiatras e psichiaters. E tuttegna, mintgatant fògl bagn dad esser en pò malobedevel.

Rafael Müller viva cun sia famiglia a Tumein. El è chasarin e chauffeur da bus a Cuira. Sch’el fiss il minister da traffic Albert Rösti, introduciss el il traffic public gratuit per tuttas e tuts.