Proxima runda per tschaffar l’aua lumneziana

Las Ovras Zervreila SA han inoltrau la damonda da concessiun per realisar il project «Conduct da transmissiun Lumnezia». La damonda ei stada publicada il vendergis vargau el Fegl ufficial Surselva e pertucca diesch vischnauncas da concessiun da Panaduz entochen Glion e Lumnezia. Ina surpresa ei la damonda da concessiun buc, essend che las Ovras Zervreila SA han gia annunziau la stad vargada da lantschar danovamein il project.

Il project che preveda da tschaffar l’aua entadem la Lumnezia e menar ella via conduct tras il cuolm al pei dil lag da Zervreila sin intschess da Val sogn Pieder. Leu duess l’aua lumneziana vegnir turbinada direct ni pumpada siado el lag da Zervreila. Ina investiziun da circa 140 milliuns francs sco quei che las ovras han informau gia la stad 2025.

Proxima runda

Igl ei la secunda runda per ina damonda da concessiun che las Ovras da Zervreila lantscheschan per tschaffar l’aua entadem la Lumnezia. L’emprema damonda datescha digl onn 2012 ed ei vegnida concedida dil cantun Grischun e dallas vischnauncas pertuccadas. Frenau quella damonda ha la finfinala la Dertgira federala che ha dau suatientscha ad in recuors dallas organisaziuns grischunas per la protecziun dalla natira e dalla Uniun da pesca naziunala.

Sche las organisaziuns per la protecziun dalla natira inoltreschan danovamein in recuors sin la damonda da concessiun, ei pil mument aunc aviert. Sco quei che Anita Mazzetta, la meinafatschenta dil WWF Grischun, ha dau d’entellir enviers la FMR hagien las organisaziuns per la protecziun digl ambient gest priu enconuschientscha dalla nova damonda da concessiun. «Pil mument savein nus aunc buca dir enzatgei pli concret.» Temps per plazzar in recuors han las organisaziuns entochen ils 20 da fevrer 2026 e quei tier il Departament per infrastructura, energia e mobilitad dil cantun Grischun.

Neginas contractivas

Contractivas denter las Ovras da Zervreila SA e las organisaziuns per la protecziun dalla natira pertuccont il project lumnezian ha ei buca dau sco quei che Anita Mazzetta gi: «Nus essan sulet vegni informai dallas ovras.» Contractivas cun quellas organisaziuns ha il meinafatschenta dallas ovras da Zervreila, Clemens Hasler giu annunziau la stad vargada enviers la Südostschweiz igl uost 2025 per anflar in consens en caussa. Sco ei para han ins dalla vart dallas ovras desistiu da contrahar. Quei ha Clemens Hasler getg alla FMR e gest aunc presentau il motiv: «Nus essan perschuadi da haver adempliu cun la nova damonda da concessiun allas pretensiuns dalla Dertgira federala.»

Il meinagestiun dallas Ovras da Zervreila ha menziunau ils siat milliuns francs previ per augmentar e proteger ils uauls dad ogna per liung dil Glogn. El ei dil meini che las organisaziuns per la protecziun dalla natira veglien impedir igl entir project aschia ch’ei havessi era fatg pauc senn da contrahar. Desistan las organisaziuns da recuorer encunter la nova damonda da concessiun, eis ei tuttavia buca segir che las tschaffadas entadem la Lumnezia vegnan realisadas.

Igl entir project drova numnadamein sustegn finanzial dalla Confederaziun per che las investiziuns sepagan. Priu il cass che la Confederaziun sustegn finanzialmein il conduct da transmissiun Lumnezia cun daners previ per la strategia d’energia federala astgan las Ovras da Zervreila duront diesch onns buca pagar tscheins d’aua. Sco quei ch’il president dalla vischnaunca Lumnezia, Daniel Solér ha getg sin damonda dalla FMR, ha la vischnaunca la pusseivladad da separticipar alla nova interpresa previda aposta per il conduct da transmissiun. Per aschia segirar ils daners che la vischnaunca ha dabien, sch’il conduct vegn tuttina in gi realisaus. Finanzialmein profitescha la vischnaunca Lumnezia sco vischnaunca da concessiun il pli fetg dil conduct da transmissiun che meina l’aua lumneziana al pei dil lag da Zervreila.