Sentupada cun hosp prominent, informaziuns e cant a Surrein

Ina ga dapli orientescha la suprastonza communala da Sumvitg sias convischinas e ses convischins davart ils projects actuals en vischnaunca. Quella ga envida ella venderdis, ils 30 da schaner 2026 ella casa da scola a Surrein. L’orientaziun entscheiva allas 19.30. Sco la suprastonza communala scriva en ina communicaziun a vischinas e vischins, vegn cussegliera guvernativa Carmelia Maissen ad esser il hosp d’honur. Ella ei parsura dil Departament d’infrastructura, energia e mobilitad dil cantun Grischun. Ultra dil referat da Carmelia Maissen vegn il president communal Patrick Schaniel ad orientar davart ils projects che spetgan la vischnaunca igl onn 2026. Il Chor mischedau Surrein embellescha la sentupada cun producziuns da cant. Suenter la part ufficiala envida la vischnaunca da star da cumpignia tier in apero. (fmr/hh)