Tristezza, solidarited e schligerimaint

Ch’in lündeschdi passo a las ündesch e mez saja sieu ospidel bod sto salda per ün mumaint, ho dit Rolf Gilgen, il mainagestiun ad interim da la fundaziun SGO chi’d es eir respunsabla pel manaschi da l’Ospidel d’Engiadin’Ota a Samedan. In quel mumaint ho la fundaziun SGO infurmo a sieu persunel davart la decisiun chi chi perdaro sia plazza da lavur, scha la Fundaziun da l’Ospidel chantunel dal Grischun (KSGR) surpiglia la gestiun. Quella soluziun haun las instanzas respunsablas propuonieu per mantegner il provedimaint da sandet in Engiadin’Ota – e davart quella proposta decida la populaziun da las ündesch vschinaunchas purtedras da la SGO in radunanzas cumünelas ed a l’urna fin als 8 marz.

Pertucheda pustüt la chüra

Scu cha Rolf Gilgen ho comunicho in marculdi insembel cun Selina Nicolay e Nora Saratz Cazin, la presidenta e la vicepresidenta da la fundaziun SGO, haun 48 persunas impieghedas tar la SGO stuvieu ler in lündeschdi, cha per ellas nu daro que üngüna soluziun e ch’ellas survgniron la desditta. «Que d’eira fich greiv, da stuvair comunicher üna tela decisiun», ho dit Rolf Gilgen, «a sun pertuchedas eir collavuraturas chi lavuran già daspö bgers ans tar nus.»

La pü granda part dals collavuratuors chi perdaron la plazza lavura illa chüra. «Que pervi da la reducziun dal numer da lets cha la fundaziun KSGR prevezza, sch’ella surpiglia l’ospidel a Samedan», ho declaro Rolf Gilgen. Impü pertuocha la reducziun da plazzas eir singulas persunas impieghedas scu meidis ed da l’administraziun da l’ospidel. «Per tuot las 20 persunas chi faun tar nus il giarsunedi vainsa però chatto üna soluziun, quellas restan impieghedas e paun glivrer lur giarsunedi.»

Procedura da consultaziun schi, planisaziun sociela na

Intaunt sun quellas decisiuns però pür annunzchedas, propi clappo nun ho auncha üngün la desditta. Fin prossem lündeschdi düra tuottüna üna procedura da consultaziun. Quella es stipuleda dal dret d’obligaziuns tar desdittas da massa e pretenda cha’l persunel possa almain fer propostas cu cha’s pudess redür il numer da persunas chi perda la plazza da lavur. «La SGO nun ho però pü bger spazi per agir, perque ch’ün’otra organisaziun cuntinuaro culla gestiun e nus nu vains lo pü üngün dret da vusch», ho dit Rolf Gilgen.

Cun que cha la SGO as rechatta intaunt in ün moratori nu do que neir na la pussibilted per güder a las persunas pertuchedas da las desdittas cun üna planisaziun sociela. «I do però üna fundaziun da donatuors cun ün fonds», ho agiunt il mainagestiun, «chi ho decis da sustegner a quellas persunas chi stöglian purter las consequenzas pü greivas.»

«A regna granda solidarited»

Ch’el saja fich superbi da sia squedra, ho Rolf Gilgen accentuo. «Eir scha que ho do in lündeschdi ün mumaint da schoc, ils paziaints nun haun remarcho ünguotta da que.» Cha’l persunel hegia reagieu da maniera fich madüra e chi regna üna granda solidarited, particulermaing illa squedra da chüra, descriva il mainagestiun l’atmosfera. «Ad es üna situaziun trista, ma per part eir surleivgianta. Tauntüna es sclarieu cu cha que vo inavaunt concretamaing.»

Cun tuot las persunas pertuchedas da la desditta da massa fo la SGO auncha ün discuors persunel. Sustgnieu vain ella eir da l’Uffizi da lavur chantunel per chatter scha pussibel üna soluziun da cuntinuaziun, tar otras instituziuns da sandet u forsa eir illa chüra d’attempos in Engiadin’Ota, inua chi mauncha intaunt auncha persunel.

Inavaunt intschertezza, fin definitiva u nouv cumanzamaint

Da l’otra vart ho la Clinica Gut SA, chi pertuocha a la Fundaziun KSGR, eir già fat ad arduond 180 impieghedas ed impiegos da la SGO ün’offerta oblianta. Ellas ed els paun cuntinuer cun lur lavur tar il nouv gestiunari da l’ospidel. Eir la Sanadura, l’instituziun da dret public chi dess seguir a la SGO, surpigliess tuot las impieghedas e’ls impiegos tar las dmuras d’attempos e la spitex.

Premissa per tuot que es cha la populaziun da las ündesch vschinaunchas purtedras dia SCHI a la fundaziun da la Sanadura ed a las cunvegnas da prestaziun transitoricas pel rest da l’an.

Oter scu a Zuoz e San Murezzan decidan las vschinaunchas prossem marculdi, ils 4 favrer, in radunanza cumünela. «Tenor ledscha pudainsa funder già ils 5 favrer la Sanadura, scha’l quorum pretais es alura già ragiunt», ho declaro Nora Saratz Cazin. Almain set vschinaunchas chi rapreschaintan almain la mited da la populaziun stöglian tenor quel quorum dir SCHI per cha que saja il cas. Schi dependa da Zuoz e San Murezzan, resta la situaziun auncha intscherta fin in marz. E scha’d es als 5 favrer già cler cha quel quorum nu vegna ragiunt, «alura stuvaro la SGO desdir in favrer a tuot sias impieghedas e sieus impiegos», conclüda la vicepresidenta dal cussagl da fundaziun da la SGO. «A drouva perque prossem marculdi ün signel cler da la populaziun», ho appello la presidenta Selina Nicolay. E Rolf Gilgen ho agiunt: «A nu’ns resta ünguotta oter cu da rester optimistics.»