20 onns maridà – ina cumedia en in act

Tge orrur per Peder Janett. Igl è ina damaun sco tuttas damauns. El sa platga cumadaivlamain en stiva sin canapé ed entschaiva a leger en sia revista preferida. Ma enstagl dal trot quotidian cumenza il brimbori. Da la boxa da musica resuna tuttenina «lur» chanzun ed ina banderola tradescha er al consort schoccà: oz igl è il 20avel di da nozzas. Cuntrari a sia dunna Ladina n’ha Peder sa chapescha per mauns ni regals ni surpraisas. El ha emblidà il pli impurtant di per sia consorta e sto constatar: «I va per vita e mort!»

Na, da rir ha Peder Janett pauc en il toc «La valischa» che l’Uniun da dunnas ed il Chor viril Riom-Parsonz-Cunter preschentan a chaschun da tschaiver. Auter vegn quai ad esser tar il public da la cumedia en in act che Salome Demarmels ha translatà dal tudestg. Las aspectaturas ed ils aspectaturs pon numnadamain guardar tut senza quitads per dis da nozzas e regals, co che Peder sa metta en la merda.

La valisch procura per surpraisas

Enstagl dad esser sincer sa perda Peder (giugà dad Elia Cavelti) numnadamain en stgisas e manzegnas marschas. Da trumpar sia dunna Ladina (giugada da Salome Demarmels) e da metter uschia en privel la lètg na vegn betg en dumonda. Agid tschertga el dentant gist tar ses ami in pau scurril Sigi Lombris (giugà da Rafael Demarmels). En sia miseria resta a Peder pauc auter che d’acceptar «l’idea briglianta» da regalar a la consorta ina valisch persa da l’eroport. Ina tala po Sigi numnadamain anc ingiantar il medem di per salvar presumablamain la lètg da ses bun ami.

Che quest regal procura per pauc plaschair tar Ladina, quai è evident. Ma sco ch’ins vegn a savair n’è la valisch betg mo in regal malgartegià. Sper different plunder senza valur èsi zuppà en quella er ina substanza ch’ins na vul betg exnum en chasa, cunzunt en preschientscha d’in policist. La runda allegra vegn numnadamain cumplettada da las perditgas da matrimoni dals Janetts: la turista eterna Charlotta Caminada (giugada da Nicole Plaz) ed il policist Flurin Spescha (giugà da Mirco Uffer) – dus sco chaun e giat. Ed er els na procuran betg mo per plaschair cun lur dispitas e lur regals per ils consorts.

E sco sche quai na tanschess anc betg, cumpara tuttenina la pensiunada Mengia Manetsch (giugada da Letizia Collet). La dunna amabla mussa per surpraisa da tuts grond interess per la valisch ingiantada per Ladina. Tgisà, tge misteris che quella ha da zuppar?

Duas producziuns – e tschaiver

Ina resposta a quella ed era a la dumonda, sche Peder po sa trair or da la buglia, porschan las acturas ed ils acturs da l’Uniun da dunnas e dal Chor viril Riom-Parsonz-Cunter prest. La cumedia – ch’els han exercità sut la batgetta dal reschissur Mitgel Collet – pon ins visitar gia quest’emna en la sala polivalenta a Riom: Venderdi, ils 6 da favrer 2026, è l’emprova generala publica da «La valischa» a las 16.00 e sonda, ils 7 da favrer 2026, è la producziun principala. Quella cumenza a las 20.15. Las portas èn dentant avertas a partir da las 19.00 cun purschida da restauraziun.

En pli fa il teater sco usità part dal tschaiver a Riom. Il motto da quest onn è AMUR. Part dal program fan en pli ulteriuras represchentaziuns umoristicas, la premiaziun da mascras ed ina notg libra.