Project per halla nova ha dau da discutar

La tractanda principala dalla seduta dil cussegl da vischnaunca da Mustér la mesjamna sera ei stada la «realisaziun d’in parc da giugs e moviment cun center d’acrobatica – dretg da baghegiar e renunzia dil deivet.» Concret: Las Pendicularas Mustér SA ein promtas da baghegiar ina nova halla el Center Fontauna. La suprastonza communala ha proponiu al parlament d’approbar il contract da dretg da baghegiar denter la vischnaunca e las Pendicularas Mustér SA cun desister dalla restituziun dil deivet restont dallas Pendiculara Mustér SA da 1,75 milliuns francs. In milliun da quella summa va sco contribuziun à fonds perdu per la halla nova. 750 000 francs van en favur dalla Golden Card. Il dretg da baghegiar per la halla duei valer 30 onns. Il cussegl da vischnaunca ei suandaus unanimamein la proposta e propona alla cuminonza da votantas e votants d’acceptar la realisaziun dalla halla nova. La votaziun all’urna ei fixada sin dumengia, ils 8 da mars 2026.

Ni avantatgs ni disavantatgs

Sco Roland Cajacob, il meinfatschenta dalla vischnaunca da Mustér ha detg sin damonda dalla FMR, ha la tractanda davart la halla nova evocau bein enqual damonda. Per part seigien las damondas vegnidas inoltradas a scret alla suprastonza communala avon la seduta. Aschia ei la damonda pertuccont la funcziun dallas Pendicularas Mustér SA, la Catrina Resort SA e la Catrina Holding SA vegnida tematisada, en special daco che la holding hagi siu domicil ordeifer il cantun Grischun. «La vischnaunca ha negins disavantatgs per exempel pertuccont taglias sin fundament da quei construct cun treis societads. Las societads dallas pendicularas e dil resort han domicil en vischnaunca. Ord vesta dil project dalla halla ei quella constellaziun da fatschenta irrelevonta», di Roland Cajacob.

Daco buc el Catrina Resort?

Medemamein seigi la damonda pertuccont igl avegnir dallas pendicularas vegnida sin meisa, sco era la damonda daco che las Pendicularas Mustér SA realiseschien buca quella halla sin lur areal. «Igl avegnir dallas pendicularas ei caussa da lezza sezza. Quei ei buc explicit ina damonda dalla vischnaunca. La pusseivladad d’ereger la halla el contuorn dallas pendicularas ei buca dada. Igl ei denton era aschia che la vischnaunca ha iniziau quei project e consequentamein ei il Center Fontauna vegnius eligius persuenter», declara Roland Cajacob.

Per giugs, acrobatica e sedivertir

La halla nova che las Pendicularas Mustér SA prevedan d’ereger gest sut la halla plurivalenta el Center Fontauna ei calculada cun cuosts da nov entochen diesch milliuns francs. Sin duas alzadas duei vegnir purschiu infrastructura per far giugs ed acrobatica. Il sport d’acrobatica ha survegniu slontsch en Surselva entras las activitads dalla gruppa d’acrobatica dall’Uniun da gimnastica Cadi. Affons e giuvenils da quella ein separticipai ils davos onns era a campiunadis svizzers. La halla vegn concepida aschia ch’ils geniturs san persequitar ils affons duront lur activitads. Il baghetg niev culla partiziun da giugs duei esser in’alternativa d’occupaziun per dis da malaura. Las duas alzadas dalla halla duein haver ina surfatscha da mintgamai 620 meters quadrats.