Uffizi da scussiun Engiadina Bassa/Val Müstair sainza persunal

L’Uffizi da scussiun e fallimaint Engiadina Bassa/Val Müstair nun ha actualmaing ingün persunal. Il manader ha bandunà sia plazza, sia substituta es absainta. Perquai vain l’uffizi manà per la dürada dad ün on da l’uffizi regiunal Plessur a Cuoira.

Tenor infuormaziuns dal Tribunal chantunal grischun, chi ha suot sai la survaglianza professiunala dals uffizis da scussiun, es quist agir normal, davo üna fluctuaziun da persunal sco quella in l’uffizi in Engiadina Bassa. Quella fluctuaziun vaiva fingià cumanzà l’on passà: Davo cha’l manader d’eira i in pensiun d’instà, ha eir sia substituta desdit sia plazza pac davo. Las plazzas vacantas as vaiva pudü occupar. Cha’l nouv manader haja però dovrà sustegn extern, avant ch’el ha bandunà ils 16 da schner l’uffizi. Trais dis plü tard es eir crodada oura sia substituta, uschè cha l’uffizi da scussiun e fallimaint a Scuol es gnü serrà.

La Regiun Engiadina Bassa-Val Müstair sto uossa recrutar nouv persunal ed eir til introdüer in sia lavur. Il Tribunal chantunal fa quint cha quai düra circa ün on fin cha l’uffizi da scussiun e fallimaint regiunal a Scuol funcziuna darcheu independentamaing. (rtr/fmr)