Migler restorant da Surmeir sera
Alla fegn da mars sera igl restorant «La Riva» a Lai. Igl local è betg simplamaintg en li noua tg’ins maglia bagn, na, igl restorant cugl cuschinier Dominique Schrotter è an Surmeir la miglra adressa per gourmets.
Hospitalitad, deletg, cultura da meisa, qualitad, en service gentil e chegl da nivo fitg ot. Tot chegl è d’attribueir agl restorant «La Riva», tgi sa catta a Lai pitost agl our digl li turistic.
Dominique Schrotter, el tgi segna siva da 14 onns per la cuschigna fegna aint igl «La Riva», el è en veir artist schi sa tracta per tratgas exquisitas, classicas, interpretadas modern, cun ena leva influenza asiata, dantant er tras spezialitads regiunalas e tradiziunalas mantga tigl star-cuschinunz er betg la creativitad e varietad. Domenique Schrotter è an veir senn en hospitant e cuschinunz tgi sa lascha cumparagler cun l’elita digls cuschiniers da renom tgi vagn an Svizra e cunzont aint igl Grischun.
Da preschaint totga igl «La Riva» a Lai tar igls miglers 50 restorants dalla Svizra. Igls experts dalla bibla per gourmets, igl «Gault Millau» on gl’onn passo taxo la cuschigna fegna da Dominique Schrotter cun 17 puncts. Tants puncts on nigns oters restorants da Surmeir, vot deir tgi igl «La Riva» a Lai è cleramaintg la miglra adressa dall’antiera regiun.
9 gedas ena steila «Michelin»
An chels 14 onns tgi Domenique Schrotter cuschigna aint igl «La Riva» a Lai ò el er sa fatg en nom sen camp internaziunal. Gist 9 gedas ò el retschet per la sia cuschigna excellenta ed exquisita ena steila «Michelin». Igl migler restorant da Surmeir sera alla fegn da mars, chegl cugl «La Riva» ed igl antier bietg neir vandia.
Gust da leger dapli?