Mustér

Dependents da temporars e pensiunaris

L’interpresa Beer Bigliel a Mustér ei engaschada ella branscha d’electro. Rodund ina tiarza da siu volumen d’incaricas ei quel dalla fotovoltaica ed en quella cumpart eis ella dependenta da temporars e pensiunaris. Sco tier biaras autras interpresas mauncan era ad ella forzas da lavur qualificadas.

Hans Huonder/FMR, il 1. da favrer 2026

Dapi che la Confederaziun ha decidiu la midada d’energia, la promoziun d’energia regenerabla ed il sustegn finanzial persuenter, ein numerus projects da fotovoltaica pigns vegni realisai. Biars tetgs casa portan ils panels che genereschan energia cun agid dalla forza dil sulegl. Gest sin quei sectur, mo era sin auters che stattan en connex cull’electricitad ed il diever d’energia, mauncan forzas da lavur qualificadas. In’interpresa che senta quei di per di ei Beer Bigliel a Mustér. La FMR ha tschentau treis damondas al cumpossessur dall’interpresa d’electro, Adrian Bigliel. L’interpresa occupescha 31 persunas, la gronda part en plazza cumpleina.

FMR: Glieud qualificada ei scarta, co sentis Vus quella munconza ni dumandau auter: Tgei forzas da lavur professiunalas encuris Vus il mument?

Adrian Bigliel: Il mument ei quei in meinagruppa per nossa partiziun da fotovoltaica, mo lu era installaturs cun certificat professiunal. La munconza da persunal sentin nus surtut ellas lavurs da fotovoltaica, mo lu era ellas installaziuns. Quellas lavurs pertuccan las installaziuns da fotovoltaica sin tetg entochen tiel indrez tecnic che mida l’energia dil sulegl en energia electrica. Las lavurs da montar ils panels ein bein pusseivlas cun persunas gidontras sco quei ei il cass tier nus cun temporars e pensiunaris. In mument vegnin nus denton era a stuer far ponderaziuns d’engaschar in meinaproject.

En quei cass ei glieud – era sils onns – aunc adina beinvegnida ella veta professiunala?

Senza temporars e pensiunaris savessen nus buc ademplir tuttas incaricas sil sectur dalla fotovoltaica. Els ein in excellent agid ella logistica e la montascha da panels. Aschia sa il meinagruppa vegnir descargaus e sa sefatschentar d’auters projects. Igl ei ina biala incarica per exempel per persunas che vulan luvrar era aunc el temps dalla pensiun. Las incaricas da fotovoltaica ein s’augmentadas fetg ils davos onns. Ina fin da quella vesin nus il mument buc, silpli ina stagnaziun. Igl avegnir dependa ei fetg dallas mesiras da promoziun per quels indrezs e lu era pil prezi che las ovras pagan per l’energia ch’ils possessurs da fotovoltaica furneschan ella reit.

Co po il problem dalla munconza da persunal qualificau vegnir sligiaus cun risguard dalla problematica dalla demografia cun adina pli paucas naschientschas?

Sil sectur dalla fotovoltaica ei vegniu fatg in bien pass en Svizra. Dapi entgins onns vegn ei purschiu era in emprendissadi dalla branscha da fotovoltaica. Tier nus ha in emprem emprendist terminau quella scolaziun ed in ulteriur ei lundervi da far ella. Per haver glieud qualificada scolein nus denton era emprendists en autras clamadas d’electro sco electricists da montascha ni d’installaziun. Il mument scolein nus siat emprendists. Jeu manegel che quei seigi ina dallas vias pusseivlas da garantir che nus hagien glieud qualificada igl avegnir. In pass en quella direcziun ei era la revista da professiuns che l’Uniun da commerci e professiun Mustér organisescha regularmein per scolaras e scolars dallas scolas popularas dalla regiun.