Il film avant il «highnoon»

Quest’emna decidan pliras vischnancas en Engiadin’Ota davart l’avegnir da l’ospital regiunal.

Quest’emna è il «highnoon» en Engiadin’Ota. Pliras vischnancas decidan davart l’avegnir da l’Ospidel Engiadin’Ota. Bler è vegnì discutà durant ils ultims mais. Ussa stoi ir svelt. L’institutziun purtadra da l’ospital – la SGO – sa chatta en in moratori. Quai è la procedura per anc impedir u entardar ina liquidaziun totala. A la SGO – ch’è sper l’ospital er anc purtadra dad autras instituziuns da sanadad en la regiun – mancan ils raps. Ina soluziun sto esser sin maisa avant l’avrigl 2026.

L’emissiun Cuntrasts dad RTR mussa ussa, paucs dis avant las votaziuns, in film davart l’entira problematica. Las trais auturas Paula Nay, Stefanie Hablützel ed Ulrica Morell dattan in sguard enavos sin la crisa, tge ch’ils protagonists e la populaziun manegian da tut la dumonda e co che las persunas direct pertutgadas – collavuraturas e pazients – resentan la situaziun. Il film («Operaziun ospital – L’Engiadin’Ota en la breduglia») dat invistas multifaras en l’entir dilemma. Grondius è che las auturas han tranter auter pudì filmar ina sesida decisiva da la SGO l’entschatta schaner 2026, nua ch’il nov construct organisatoric cun la «Sanadura» e cun novas cunvegnas da prestaziun è vegnì debattà. Sper tals muments-clav lascha il film (27 min) udir in chor polifon da pliras vuschs ed opiniuns.

Per votantas e votants da l’Engiadin’Ota è quest film da Cuntrasts pia in grondius instrument per sa furmar il davos mument anc in’atgna opiniun – ed ir a vuschar! Il film mussa pertge che la participaziun democratica è propi urgenta  … L’emissiun è da chattar sin ils chanals dad RTR.