Il bratsch armà da Trump

L’autoritad ICE en ils Stadis Unids procura dapi emnas per lingias grassas. Uffiziants han schluppettà dus civilists a Minneapolis. Però tge e tgi è questa «ICE» insumma? En films da Hollywood èn gea surtut da vesair la FBI e la CIA, las duas autoritads federalas d’inquisiziun e da segirtad. La ICE, la «Immigration and Customs Enforcement», era fin uss en la sumbriva.

Ma durant il segund temp d’uffizi da Donald Trump ha questa autoritad gudagnà impurtanza ed è vegnida pli brutala. Il stadi american promova fitg ferm la recrutaziun, per uschia schlargiar la truppa e dar a quella anc dapli cumpetenzas. L’incumbensa principala da la ICE è gea da limitar l’immigraziun en ils Stadis Unids e da metter als cunfins bleras persunas immigradas – in dals programs politics principals da Donald Trump.

In’explicaziun e valitaziun da questa truppa dat ina curta documentaziun (11 min) dad Arte (QR-code): «ICE: Was hinter Trumps Schocktruppe steckt». En quella vegn ins tranter auter a savair che la regenza da Donald Trump vul augmentar massivamain il budget dad ICE, uschia ch’ella daventass anc pli pussanta che la FBI. Naschida è l’autoritad gia avant passa 20 onns, en consequenza dals acts da terrur dals 11 da settember 2001. En il filmet dad Arte vegn ins er a savair che la scolaziun per in «schuldà» dad ICE cuzza mo 47 dis – perquai che Donald Trump è il 47avel president american. Pon ins pia numnar ICE il «bratsch armà» da Trump ed ina «truppa privata» dal president? – In expert franzos di: «Oui.»