In ed aunc in
Jeu enconuschel biaras persunas che han dus schigentamauns en cuschina. In pils mauns. In per la vischala.
Jeu haiel ditg quitau quei remarcabel. Buca falliu – mo surprendent. Aschia sco ins smarveglia sch’enzatgi di ch’el sorteschi alfabeticamein sias spezarias. Ins tratga: enzacu ha quella persuna priu activamein la decisiun da far quei. Pas mal.
Jeu enconuschevel buca quei da casa. Tier nus devi in schigentamauns en cuschina. El era responsabels per tut: ils mauns, la vischala, las larmas – e, tgisà, forsa era aunc per autras parts dil tgierp. Ins sa gie mai tgei ch’il mintgadi porscha. Basta. El pendeva leu, quietamein, fideivlamein ed ha fatg siu duer tochen ch’el vegneva remplazzaus – enzacu lu.
En autras cuschinas ei quei denton auter. Leu survegn mintga teila in’atgna cumpetenza. Aschia san ins magari leger sur il crutsch dil schigentamauns: «mauns» ni eba «vischala».
Sempels plaids. Decent, mo clar. In indezi quiet: cheu regia uorden. Ni silmeins la bunaveglia leutier.
Jeu sedamondel lu adina a tgi che quellas indicaziuns sedrezzan. A hosps che vegnan sin viseta e che dueigien po far tut endretg? Ad affons ch’emprendan che mintga caussa ha siu plaz? Ni a carschi per far endamen: ei tonscha buca mo da haver ensenn.
Jeu admirel empau quellas cuschinas. Lur clarezia. La moda da tschentar reglas senza exprimer ellas. Ins scriva semplamein ellas vid la preit. Aschia resta il tun amicabel, mo la direcziun ei clara.
Ed aschia stat beinenqual persuna en cuschina, schigenta ils mauns e spera discusamein da haver priu gl’endretg.
Il schigentamauns pils mauns ei igl idealist. El crei en tei. Il schigentamauns per la vischala ei il realist. El enconuscha tei.
Daferton haiel jeu uss era dus. Senza inscripziuns vid la preit. Ins duess gie buca stravagar.
E mintgaton prendel jeu tuttina il falliu. Semplamein per mirar sch’il mund stat eri. – El ei aunc buca staus eri. Aunc mai. Propi.
Gust da leger dapli?