Sonda proxima ègl puspe schi gliunsch

Igl tschever, da blers, er numno la 5avla staschung è en taimp tgi blera gliout giolda, en taimp allegrevel ed en taimp da baralot. Siva digl taimp da tschever scumainza alloura la curesma tgi cozza 40 deis ed è en taimp pi quiet gist ainten las regiuns pi catolicas.

An Svizra ins canoscha igl tschever cunzont a Basilea (igl tschever da Basilea totga schizont tigl Patrimoni mundial dall’UNESCO), popular è sa tgapescha er igl tschever a Lucerna, ma er a Coira totga igl tschever tar egna dallas grondas occurrenzas digl onn.

An Surses ò la musica da «gugga» Fetters Sursetters cun las uniuns da donnas cunzont gronds marets tgi igls davos 20 onns è igl tschever nia pi popular. Chegl cunzont cun introdueir en til da tschever per unfants. A chel sa participeschan vers 200 unfants, bagn la gronda part unfants indigens, ma alloura er unfants tgi passaintan gist lour vacanzas ainten la regiun. Tradiziun on pero er igls bals da tschever a Salouf ed er a Riom, cun premiaziun da mascras.

Ena furmaziun da 25 musicants e musicantas

Sonda proxima, igls 7 da favrer 2026, è puspe schi gliunsch e chegl a Salouf. Allas 13.30 è aint igl manevel dalla scola la partenza digl til da tschever d’unfants. Naturalmaintg tgi igls costums, las biodas, igls «outfits» singulars digls unfants, las bleras calours frestgas dattan all’occurrenza la dretga noda, ma er igls Fetters Sursetters dastgan naturalmaintg betg mantger. La furmaziun cun 25 musicants e musicantas dat agl til da tschever pir dretg igl ambiaint tgi totga e cunzont igl vistgia musical. La musica da tschever magna Robin Demarmels e president digls Fetters Sursetters è Luca Battaglia.