20 onns maridos – ena cumegia an en act

Tge sgarschevel per Peder Janett. Igl è ena dumang scu tot las dumangs. El sa platga cumadevlamaintg ainten steiva sen igl canape ed antscheva a liger ainten la sia revista prefereida. Ma anstagl digl trot quotidian antscheva igl brimbori. Dalla boxa da musica resunga tottanegna «lour» canzung ed ena banderola tradescha agl consort schocco: oz è igl 20avel de da nozzas. Cuntrari a sia donna Ladina n’ò Peder sa tgapescha paragea ni regals ni surpresas. El ò amblido igl pi impurtant de per sia consorta e stò constatar: «I vo per veta e mort!»

Na, da reir ò Peder Janett pac aint igl toc «La valischa» tgi l’Uniun da donnas ed igl Chor viril Riom-Parsonz-Cunter preschaintan a caschung da tschever. Oter vign chegl ad esser tar igl public dalla cumegia an en act tgi Salome Demarmels ò translato digl tudestg. Las aspectatouras ed igls aspectatours pon numnadamaintg vurdar tot sainza chitos e pansiers a deis da nozzas e regals, scu tgi Peder sa metta ainten la merda.

La valischa procura per surpresas

Anstagl dad esser sincer sa perda Peder (giuia dad Elia Cavelti) numnadamaintg ainten stgisas e manzignas marschas. Da desillusiunar sia donna Ladina (giueida da Salome Demarmels) e da metter uscheia an prievel la lètg na vign betg an dumonda. Ageid tschertga el dantant gist tar igl sies amei en po scurril Sigi Lombris (giuia da Rafael Demarmels). Ainten la sia misergia resta a Peder pac oter tgi d’acceptar «l’ideia briglianta» da regalar alla consorta ena valischa persa digl eroport. Ena tala pò Sigi numnadamaintg anc intgantar igl madem de per salvar prubabel la lètg digl sies bung amei.

Tgi chest regal procura per pac plascheir tar Ladina, chegl è evident. Ma scu tg’ins vign a saveir n’è la valischa betg angal en regal malgartagea. Sper different plunder sainza valour è zuppo ainten chella er ena substanza tg’ins na less betg exnom ainten tgesa, cunzont betg an preschientscha d’en pulicist. La runda allegra vign numnadamaintg cumplettada dallas perdetgas da matrimoni digls Janett’s: la turista eterna Charlotta Caminada (giueida da Nicole Plaz) ed igl pulicist Flurin Spescha (giuia da Mirco Uffer) – dus scu tgang e giat. Ed er els na procuran betg angal per plascheir cun lour dispetas e lour regals per igls consorts.

E scu schi chegl na tanschess betg anc, cumpara tottanegna la pensiunada Mengia Manetsch (giueida da Letizia Collet). La donna amabla mossa per surpresa da tots grond interess per la valischa intgantada per Ladina. Tgi so, tge misteris tgi chella ò da zuppar?

Dus producziuns – e tschever

Ena rasposta a chella ed er alla dumonda, schi Peder pò sa trer or dalla boglia, porschan las actouras ed igls actours dall’Uniun da donnas e digl Chor viril Riom-Parsonz-Cunter gio dalunga. La cumegia – tg’els on exercito sot la batgetta digl reschissour Mitgel Collet – ins pò visitar gio chest’emda ainten la sala polivalenta a Riom: Venderde, igls 6 da favrer 2026, è la prova generala publica da «La valischa» allas 16.00 e sonda, igls 7 da favrer 2026, è la producziun principala. Chella antscheva allas 20.15. Las portas èn dantant avertas gio a parteir dallas 19.00 cun purscheida da restauraziun.

Pinavant fò igl teater scu usito part digl tschever a Riom. Igl motto da chest onn è «Amour». Part digl program fon ulteriouras represchentaziuns humoristicas, la premiaziun da mascras ed ena notg libra.