Nova societad per Zervreila

La nova organisaziun senumna «Societad da project Zervreila SA». Ella ei vegnida fundada sco societad anonima. Il scopo e la finamira da quei gremi ei da preparar la nova concessiun cun las Ovras electricas Zervreila (OEZ), respectivamein da concessiunar da niev las ovras. La «Societad da project Zervreila SA» ei – tuttina sco quella a Surses – vegnida fundada cun in capital d’aczias da 100 000 francs. La cooperaziun dallas vischnauncas da concessiun dallas Ovras electricas Zervreila ed il Cantun ei participada a quei capital cun mintgamai la mesadad.

Preparar la nova concessiun

Las vischnauncas da concessiun dall’ovra electrica Zervreila ein Flem, Ilanz/Glion, Lumnezia, Panaduz, Sagogn, Schluein, Trin, Tumein, Val S. Pieder e Val Stussavgia. Quellas vischnauncas han decidiu igl onn vargau da visar la concessiun actuala cun la OEZ. Quei ei stau la basa per fundar la Societad da project Zervreila SA. Il cussegl administrativ dil niev gremi fuorman Stefan Schmid, il president dalla Cuminonza d’interess dallas vischnauncas da concessiun Zervreila, Thomas Schmid, il menader digl Uffeci cantunal da traffic ed energia ed igl advocat Conradin Luzi. La radunonza constitutiva da l’organisaziun da project ha giu liug ils 28 da schaner 2026 a Val S. Pieder.

Concessiun scada 2037

Els stoppien luvrar a moda speditiv, ha Stefan Schmid detg enviers la FMR. «En emprema lingia stuein nus inagada elaborar las referenzas per la nova concessiun. Quei ein per exempel sclariments pertuccont igl ambient ed in rapport tecnic.»  Il secund pass dalla concessiun nova preveda da menar contractivas cun ils partenaris industrials. Ella constellaziun ch’ins secunvegn ad ina nova concessiun vegn ins lu alla fin finala realisar la concessiun.  La concessiun actuala dall’Ovra electricas Zervreila SA scada igl onn 2037.