«Eau rest sülla Titanic»

«Eau nu d’he auncha realiso quista decisiun», disch Selina Nicolay zieva avair vis ils resultats da las nouv vschinaunchas sül telefonin (guarda boxa). E be listess stu ella già analiser scu üna sportista in püs microfons sieus prüms sentimaints: «Ad es simplamaing bel: la granda preschentscha cò in sela ed il resultat unanim! Que es la peja per bgera lavur da bgera glieud – simplamaing üna granda arcugnuschentscha.»

Ün rituel da la presidenta

Divers «grazcha-fichs» directs ho la presidenta cumünela da Bever survgnieu güsta pochs minuts aunz las intervistas, cur cha votantas e votants sun sortieus our da la sela da gimnastica. Ad es nempe ün dals rituels da Selina Nicolay: A la fin da mincha radunanza prouva ella da der il maun a tuot la glieud chi’d es gnida: «Que es ün bel mumaint per ün barat, ün mumaintin per auncha discuter duos, trais chosas.»

Selina Nicolay (37) nun es be steda in acziun quists ultims mais scu presidenta da Bever. Daspö settember 2025 es ella presidenta da la SGO, la Fundaziun per il provedimaint da sandet in Engiadin’Ota. Quella es purtedra da bgeras instituziuns da sandet illa regiun – traunter oter da l’ospidel, da las dmuras d’attempos e da la spitex. Quista saira staun las ündesch vschinaunchas decider per la terza vouta infra desch mais, scha’s voul salver la SGO our da sieus battibuogls finanziels.

Perfin ün schlavazzun fo alarm

Il rituel da der il maun nu fo Selina Nicolay dal rest be per dir adieu, ma eir per bivgnanter a las radunanzas. Quista saira nu varegia ella però do il maun a tuot ils 137 votants. La presidenta da Bever stu perque rir güst tal bivgnaint a la radunanza: «Spraunza vegn eir taunta glieud a nossa prosma radunanza da quist an!» Eir la glieud in sela guarda intuorn e stu rir.

Ma zieva las 20.00 es que sto glivro cun skerzer. Già in sieus prüms pleds repeta Selina Nicolay sia frasa da las ultimas eivnas: «Nus stuvains insè decider davart ün’unica dumanda: Vulains nus in avegnir ün ospidel – schi u na?» Cun quels pleds metta ella la marca. Però scu scha quels pleds nu vessan auncha bastieu per fer güzzer las uraglias, passa güst in quel mumaint ün schlavazzun dadour la sela. Our da fnestra as vezza cu cha quel spuolvra sü la naiv fras-cha e fo girer il sbrinzleder cotschen. A pera be ün alarm organiso al güst mumaint.

Bod 20 milliuns be quist an

In sela vo que svelt vi dals «fats», scu cha Selina Nicolay disch suvenz. A vo pella fundaziun da la nouva structura organisatorica (Sanadura) ed alura per trais cunvegnas da prestaziun. Tuot ils quatter progets da votaziun haun sü ün’etiquetta da predsch. In tuot cuostan la gestiun e la reorganisaziun 19,55 milliuns francs a la regiun – e que be per quist an 2026. Circa la mited da quel import (8,5 milliuns) sun però imprasts cha las vschinaunchas stuvessan alura survgnir inavous. Che cha las futuras cunvegnas da prestaziun custaregian a partir dal 2027, que nun es part da las decisiuns da quista saira in Engiadin’Ota.

Selina Nicolay ho dimena da persvader a «sia glieud» da Bever da dir SCHI ad üna part da la «clev regiunela» da 543 490 francs. Que nu pera insè dad esser uschè bger. Ma scha’s so, cha que sun be ils raps per insomma sgürer l’inter provedimaint da sandet per l’an 2026, lura es que ün bel schlip.

Ün temp da Nadel intensiv

Selina Nicolay declera pass a pass ils quatter differents progets in votaziun. Il grand baccun es natürelmaing la part da l’ospidel culla cunvegna da prestaziun traunter avrigl e december da quist an 2026 cun l’Ospidel chantunel dal Grischun. Da salver specielmaing quell’instituziun ho procuro illas ultimas eivnas per bger rumpatesta a la presidenta da la SGO: «Ad es sto fich intensiv. Ma da l’otra vart d’heja pudieu ramasser experienzas in quists differents champs da la problematica, da la medicina fin a dumandas giuridicas. Traunter Nadel e Bümaun es sto il temp il pü intensiv, perque cha nus vaivans da finaliser la missiva. Que ho do bgeras tschantedas e telefonats vi e no.»

«Que sun persunas chi vivan cò»

Inavous in radunanza a Bever: In sela es da sentir cha güsta la dumanda davart l’avegnir da l’ospidel svaglia grand’attenziun, eir perque cha la nouva collavuraziun cun l’Ospidel chantunel ho per consequenza üna reducziun da persunel. Var 50 impieghedas ed impiegos perdaregian lur lavur. Perque do Selina Nicolay tiers in marculdi invers la FMR: «Que sun stos ils mumaints ils pü difficils, da savair cha que do bgeras desdittas. Que fo simplamaing mel. A’s cugnuoscha la glieud, que sun persunas chi vivan cò.» E perque l’es que important da manzuner eir in radunanza: «Eau vuless ingrazcher a tuot las collavuraturas ed als collavuratuors per lur ingaschamaint e lur lojalited in quist temp da melsgürezza.»

Eir illa discussiun – zieva las explicaziuns da la presidenta – do que impustüt dumandas intuorn l’ospidel. Ün votant dumanda perche cha la cifra da las persunas chi survegnan la desditta variescha adüna darcho. A Selina Nicolay nu resta bger oter cu da piglier incunter la critica e render attent quaunt difficil cha saja – per il gremi strategic da la SGO – da pudair fer calculaziuns precisas in dumandas operativas per ün ospidel da l’avegnir.

Da barchas e diamants

Già zieva 45 minuts vain il mumaint decisiv: Quatter voutas dian las 137 votantas e votantas SCHI. Unanim tar mincha proget. In cumbinaziun cul resultat illas otras vschinaunchas es que il rinch da salvamaint per l’ospidel e las otras instituziuns. Ma a spetta auncha bgera lavur per mner la barcha a buna riva. La chapitauna da la SGO resta però al timun: «Eau d’he adüna dit: Eau rest sülla Titanic, fin cha’l moratori es trat tres, fin cha la SGO es istorgia.» Que ho Selina Nicolay eir manzuno in marculdi in radunanza, ma pür suot varia. Las squedras intuorn la nouva Sanadura gnaregian constituidas a partir da la mited da marz.

Ün prominent votant ho punct a las 21.00 eir auncha piglio il pled a Bever – il manager da sport Gian Gilli. I’l jargon sportiv ho’l dit suot varia: «Be cun bger squitsch vegnan creos diamants! Las persunas respunsablas haun chatto uossa la soluziun optimela. E perque vulessi ingrazcher e giavüscher ün applaus.» L’applaus in sela es sto il signel eir per Selina Nicolay per ir a la porta – per der il maun a tuottas e tuots e dir grazcha.