Parcar cun daners bluts ad Ilanz/Glion

«Nus pretendin dalla suprastonza communala dalla vischnaunca Ilanz/Glion che tut ils parcadis publics en vischnaunca sappien era vegni pagai cun daners bluts naven dad immediat.» Quei ei l’emprema construcziun dil text ch’ils iniziants dalla petiziun han distribuiu egl onn vegl en tuttas scaffas da brevs dalla vischnaunca dad Ilanz/Glion. Ils petiziunaris scrivan che la pusseivladad da pagar ils parcadis mo cun mieds digitals seigi ina discriminaziun da tut quellas e quels vischins ni d’ordeifer che seigien surdumandai ni che veglien buca pagar lur parcadi cun mieds digitals.

Finamira ei d’optimar

Ils responsabels dalla vischnaunca Ilanz/Glion ein surstai ch’il slargiament dallas pusseivladads da parcar en vischnaunca munta ina discriminaziun pils petiziunaris. Ina petiziun seigi in instrument per vischinas e vischins cun domicil en vischnaunca. La petiziun lantschada ussa corrispundi buca dil tuttafatg als fatgs che seigien avon maun. Sco il menader dalla canzlia Michael Spescha ha detg sin damonda dalla FMR vegli negin discriminar persunas che parcheschien lur autos sin territori da vischnaunca. Il niev uorden da parcar sebasi a ponderaziuns extendidas stipuladas ella lescha che seigi vegnida preparada d’ina cumissiun e deliberada dil parlament communal.

Tractament inegual

Las auturas ed ils auturs dalla petiziun han detg enviers la FMR che la situaziun uss a Glion seigi ina fuorma d’apartheid: Tgi che paghi digital astgi parcar dapertut e quels che sappien ni veglien buca pagar digital, astgien parcar mo en certs loghens, schiglioc vegnien els castigiai.

Plirs loghens cun muneida

Il canzlist communal Michael Spescha accentuescha ch’ei seigi pusseivel actualmein da pagar en plirs loghens cun daners bluts. Era sappi ins retrer vignettas al spurtegl dalla controlla da habitonts encunter daners bluts. Michael Spescha declara ch’il principi da commensurabladad vegni applicaus cun realisar ils proxims pass. Ei vegni a dar plirs loghens en vischnaunca cun parcadis ch’ins sappi pagar cun daners bluts. «In da quels parcadis ei il plaz fiera da Glion, plinavon ils parcadis en vischinonza dil bogn aviert sigl areal Fontanivas, quel sper igl anteriur Migros ed in liug el quartier da Sontga Clau sur la punt dil Rein.» 

Emprema mes’ura gratuita

Il niev uorden da parcar prevedi ultra da quei era che l’emprema mes’ura da parcadi seigi gratuita, e quei sin tut ils parcadis sin intschess da Glion. Quellas midadas vegnien realisadas el decuors digl emprem miez onn 2026. Sigl areal dalla nova staziun detti era ina purschida da parcadis gratuits per persunas che portien ni vegnien per viagiaturs dil traffic public.

Tener quen dils cuosts

La cumpra d’ina ura da parcar caschuna tenor la vischnaunca Ilanz/Glion cuosts da varga 5000 francs, di Michael Spescha. La demontascha dallas uras da parcar veglias seigi stada necessaria pervia da defects e disturbis. «Introducir las 30 minutas gratuitas e mantener las taxas per ura sil livel actual ei buca pusseivel, sch’igl ei da montar supplementarmein pliras novas uras da parcar.»