Or da dus resorts vegn fatg in

Per il futur resort da vacanzas Viols èn uss enconuschentas las duas interpresas che investeschan en il project da construcziun e che mainan lura la gestiun. La nova «soluziun» è vegnida preschentada venderdi passà a Cuira.

Il Mountain Resort Fund da Sion investescha 40 milliuns francs en il project Viols. Quel cumplex cumpiglia sis chasas cun var 80 abitaziuns gestiunadas. Planisads èn er in restaurant ed in spazi da wellness cun sauna e bogn cuvert che duai esser accessibel per part era publicamain.

Il manaschi da l’entir resort surpiglia suenter la construcziun l’interpresa Swisspeak Resorts. I sa tracta pia da duas interpresas ch’èn activas en l’entira Svizra, tranter auter era tar il Pradas Resort a Breil en Surselva.

Sper questa surpigliada cumpra il fond d’investiziun da Sion gist er il resort existent Surses Alpin che sa chatta paucs meters sper il nov resort Viols. Era Surses Alpin – cun quatter chasas e 70 abitaziuns gestiunadas – vegn en l’avegnir manà da Swisspeak Resorts.

Glisch verda suenter onns da cumbat

Gia il zercladur 2025 aveva la gruppa da project Resalpina GmbH infurmà ch’ella veglia cumenzar cun las lavurs da bajegiar per il resort Viols la primavaira dal 2026. La lubientscha da construcziun saja gia valida e na stoppia betg vegnir renovada. Suenter ina lunga perioda da spetga, chaschunada da la pandemia da corona e da singuls cas da dretgira, aveva il Tribunal federal refusà tut ils recurs l’onn 2024. Uschia aveva il resort da vacanzas Viols survegnì la glisch verda per sia realisaziun.

«Ina destinaziun cun potenzial»

Marcel Friberg, il manader da Resalpina GmbH, ha ditg perquai quest venderdi envers RTR:  «Nus avain adina savì ch’i va ditg. Ma i n’è mai stada la dumonda da dar si.» Ussa vegn pia l’entir project ch’è pinà per la construcziun, vendì enavant al Mountain Resort Fund da Sion. Quella gruppa d’investiziun è persvasa dal project e dal lieu, sco che Philippe Lathion ha declerà quest venderdi a Cuira: «Tenor nus è Savognin ina destinaziun cun in potenzial fitg ferm, fitg attractiv per famiglias e per lavurar durant tuttas quatter stagiuns. Savognin è ina destinaziun che merita in resort destinà spezialmain per famiglias.» Cun gist er anc surpigliar il resort Surses Alpin dasperas vegn il fond ad unir prest 700 letgs sut in tetg organisatoric.

Ina «rendita» per la vischnanca

Da la vendita da Surses Alpin vegn a profitar era la vischnanca da Surses. Quella posseda – tenor indicaziuns dad RTR – in terz dal pachet d’aczias da quel resort construì l’onn 2025. Il president communal Daniel Wasescha è perquai satisfatg da la midada da maun che vegn prendida en mira suenter passa 20 onns: «Il resort Surses Alpin è stà in fitg bun project ch’ha purtà blera rendita en la val. Sche nus vegnin ussa da vender il cumplex, lura dat quai anc ina giada ina bella rendita en la cassa.»

Per quant ch’il resort Surses Alpin vegn vendì, n’è betg vegnì tradì a la conferenza da medias da venderdi a Cuira. Perquai che la vischnanca è involvida en la vendita sto era la populaziun vegnir infurmada l’emprim.

La vischnanca Surses è en in rom pli pitschen «participada» er al nov resort Viols, perquai ch’ella ha deliberà l’avrigl 2025 in credit d’investiziun da 948 000 francs per la construcziun da la via d’access privata e da las plazzas da parcar. Ils custs vegnan repartids tranter la vischnanca ed il proprietari dal resort.

Il president dal cussegl d’administraziun da Surses Alpin, Otmar Netzer, na fa la vendita betg gronds quitads, sco ch’el ha ditg envers RTR: «Mal il venter faschessi a mai, sch’ins na vesess betg co ch’i va vinavant. Però quai n’è betg il cas, perquai ch’ins vesa ch’ils dus resorts vegnan a marschar bain en cumbinaziun e ch’els vegnan a generar anc dapli pernottaziuns en la regiun. Savognin dovra pernottaziuns!»

L’istorgia davart ils recurs

Il project turistic Viols vegn planisà gia dapi l’onn 2017. Quel è vegnì tractà duas giadas dal Tribunal federal. Encunter il project inoltrà il 2019 aveva la Helvetia Nostra fatg recurs cun l’argument ch’igl haja dà sbagls formals e che la lubientscha che la vischnanca da Surses haja dà al project, saja d’annullar.

Suenter ch’il cas è ì duas giadas tranter la Dretgira administrativa dal chantun Grischun ed al Tribunal federal vi e nà, è lezza vegnida a la conclusiun en sia segunda decisiun che las proceduras sajan vegnidas tegnidas en. En sia argumentaziun ha il Tribunal federal scrit che damai ch’ils investurs desistian ussa da bajegiar ina tur cun ascensur, il sulet punct dispitaivel dal project, possia il recurs vegnir renvià.