Nadja Kälin traunter ambiziun e calma

Predazzo, Tesero, Cavalese: Quists lös staun pel sport da skis nordic illa regiun taliauna Trentino. Regulermaing haun lö cò cuorsas da la coppa mundiela, trais voutas s’ho que realiso cò champiunedis mundiels da skis nordics ed uossa haun lö cò las concurrenzas da passlung e da sagl cun skis dals gös olimpics d’inviern Milano Cortina 2026. Düraunt quist di da favrer però fo il paradis da passlung sün 1000 meters sur mer ün trist aspet. Il tschêl es grisch, naiv ho que be pocha, las temperaturas sun chodas e be avaunt cuort ho que auncha pluvieu.

Da quistas circunstanzas externas nu’s lascha la passlunghista da San Murezzan Nadja Kälin brich as distrer. Illa lobby da l’hotel a Predazzo, inua cha’l team svizzer allogescha daspö ans do ella i’l discuors culla Posta Ladina sguards inavaunt ed inavous. Inavous sün que ch’ella ho prasto in sanda passeda cun sieu quart rang tar il skiathlon olimpic, inavaunt sün tuot que chi segua düraunt la prosm’eivna e mez ed auncha fin la fin da la stagiun. 

Segn d’exclamaziun istoric

Eir ün pêr dis zieva sia quarta plazza in sanda passeda – ün rang chi’d es gratagio i’l passlung svizzer daspö bod quatter decennis tar l’olimpiada be üna vouta – resta Nadja Kälin tar sia valütaziun ch’ella vaiva do già cuort zieva la cuorsa: «Eau d’he guadagno üna quarta plazza e brich pers la medaglia da bruonz.» Cha que vegna traunteraint minchataunt eir l’impissamaint, «vess eau tauntüna …» nu voul ella schnajer. «Ma finelmaing esa adüna auncha üna quarta plazza.» Ch’ella ho pudieu metter cun sia quarta plazza istoricamaing ün segn d’exclamaziun pel passlung svizzer l’es gnieu consciaint pür i’l arriv, cur cha oters l’haun dit que. E que l’ho fat plaschair: «Ad es cool, cha que vo i’l passlung svizzer darcho insü.»

Skiathlon sün 10 kilometers classic e zieva la müdeda da skis sülla medemma distanza skating – que es la cuorsa chi pera dad esser l’adatteda per Nadja Kälin. Avaunt quatter ans es ella currida tar sia premiera olimpica in China sül 21evel rang, tar il Champiunedi mundiel a Trondheim avaunt ün an es ella gnida fich ferma sesevla.

Il team viva in üna bubble

Inavous tar sanda passeda. «Eau d’eira gniervusa, vaiva però già cun am s-chuder ün bun sentimaint», s’algorda Nadja Kälin. «Ma pür süllas prümas duos rundas d’heja bado ch’eau am saint bain e cha que vo bain a cuorrer cun las otras.» Decisiv d’eira tenor ella eir la fiduzcha i’l materiel – güsta tar il skiathlon, per na perder illa tecnica classica dapü energia cu cha que fess dabsögn.

Zieva la cuorsa ho ella survgnieu pustüt via medias socielas bgeras reacziuns, ma eir noviteds persunelas. Ch’uschigliö nu’s sapcha bger da que chi capita dadour il passlung, causa cha’l team as rechatta in üna sort bubble per eviter pussiblas infecziuns, per na clapper aint dafraid. Perfin cun sieus genituors chi sun eir preschaints as chatta ella be our il liber. «Da tschanter insembel in ün cafè nu füss üna bun’idea.»

Güst zieva la cuorsa da la coppa mundiela i’l Goms es il team viagio zieva avair survgnieu ils vstieus olimpics a Seefeld e zieva ün’eivna e mez directamaing inavaunt a Predazzo. Lo resta ella fin tar la cuorsa finela da 50 kilometers ils 22 favrer. «Nus essans adüsos dad esser per lung temp in viedi.» Ch’important saja da s’occuper eir cun otras chosas e nu be discuorrer dal passlung, ho ella respus la dumanda davart il «Koller» i’l allogi.

Partir il plaschair culla sour

Üna granda differenza traunter las cuorsas da passlung olimpicas e las concurrenzas da la coppa mundiela nu vezza Nadja Kälin cun excepziun da las controllas da sgürezza pü severas pü u main üngünas. «Ad es damain il ram cu l’egen sentimaint chi’m disch: Ad es ils gös olimpics.» Ch’ella po passanter ils gös olimpics insembel cun sia sour Marina, cun la quela ella parta la chambra, la pera pustüt cool. Ella ho plaschair cha Marina ho ragiunt in sanda cul 19avel rang la megldra prestaziun da la stagiun. 

I’ls quatter dis traunter sia cuorsa da sanda passeda e la cuorsa dad hoz gövgia da 10 kilometers skating vela impustüt da chatter la dretta balauntscha traunter recreaziun ed activaziun. «Da fer propi ünguotta nun es üngüna opziun. Eau sun steda regulermaing süls skis, uossa seguan uniteds pü cuortas, ma per la peja pü sveltas, per cha’l corp nun indrumainza e ch’el saja pront per la prosma cuorsa.»

Per quistas nu s’ho ella consciaintamaing missa üngün böt, partenzas individuelas la pleschan main bain. Ella spera d’avair bun materiel e po ir a la partenza cul savair ch’ella ho già fat üna fich buna cuorsa. Pütöst pü grand stima ella sias schanzas tar la cuorsa finela da 50 kilometers cun partenza collectiva. «Ils 50 kilometers sun però lungs ed incalculabels, a po capiter bger.»

La coppa mundiela ho cleramaing priorited

In vista al temp zieva l’olimpiada so Kälin, cha quista fasa es suvenz delicata. Cha la tensiun as diminuescha, bgeras atletas ed atlets gnian amalos, cha que saja capito eir ad ella l’an passo. Decisivas sun, scu ch’ella cuntinuescha, bunas emoziuns per piglier cun se il schlauntsch. Ella guarda cun tensiun vers las trais fins d’eivnas da la coppa mundiela in Scandinavia, zieva vo que auncha per üna cuorsa in America dal Nord. In sieu focus es da nu gnir amaleda, rester sauna e zieva ramasser pü bgers puncts da la coppa mundiela scu pussibel. Perche cha schabain ch’ella ho manchanto l’üna u l’otra cuorsa es eir auncha bger pussibel illa valütaziun cumpletta. Perque nu saro ella, chi ho guadagno il Maraton engiadinais avaunt quatter ans, da la partida tar sia cuorsa a chesa. Uschè scu cha Nadja Kälin es pel mumaint in viedi nu d’eira üna partenza tar il maraton neir da spetter.