Nov’entschatta entadem la Stussavgia

Igl unviern drovan ins circa in’ura da carrar naven da Versomi entochen a Turrahus il pli entadem la Val Stussavgia. Dadens il vitget da Thalkirch sin 1700 meters sur mar schai l’ucliva Turrahus cun sia ustria e pensiun cul medem num. Igl albiert vegn frequentaus igl unviern da skiunzas e skiunzs che fan turas e la stad da viandontas e viandonts che van sur il Pass da Tumegl denter Val e Stussavgia. Era indigenas ed indigens entaupan ins savens el Turrahus. Igl atun ein il restaurant e la pensiun cun 50 letgs era in liug da s’entupada da catschaduras e catschadurs. A propo selvaschina: Naven dalla terrassa dil Turrahus san ins observar sillas spundas da l’autra vart dalla val gruppas da capricorns.

Inamuraus els cuolms

Dapi il december 2025 ha Oliver Seifert fittau il Turrahus. Sco passiunau alpinist da hobi ha Oliver Seifert viu la stad vargada igl inserat cun la tscherca d’in ustier pil Turrahus. L’entschatta uost 2025 ha el visitau il liug per mirar nua che quei seigi insumma. «Jeu saiel buca co declarar quei, mo jeu sun s’inamuraus immediat en quei liug, el baghetg cul restaurant, els cuolms ed ella Val Stussavgia insumma. Jeu haiel encuriu ditg ed alla finala anflau quei liug dil qual jeu havevel daditg semiau. Jeu haiel giu cletg.»

Dil manager agl ustier

Oliver Seifert raquenta da ses temps sco manager entochen sil pli ault scalem da cader. Denter auter ha el luvrau per concerns sco CocaCola ni era Audi. «Suenter varga vegn onns haiel jeu decidiu da bandunar il mund dalla hectica industriala che vegn dominaus d’ina societad dil ferm. Jeu haiel buca pli saviu acceptar co che quellas interpresas tractan il carstgaun. Senza negin respect.» Ils concerns gronds seigien mai pleins e veglien adina gudignar dapli. «A mi ha ei tunschiu. Jeu vi buca pli. Quella lavur duein auters far ussa», raquenta el e cumpletescha ch’ils menaders dils gronds concerns survesien semplamein il carstgaun sco collaboratur enteifer ils process da lavur. Egl avegnir vegli el cultivar e dar peisa allas valetas humanas e – cun far buna lavur –  metter el center pli fetg il carstgaun, pia sias collaboraturas e collaboraturs.

Il carstgaun ei centrals

El creigi ch’ei detti aunc biaras persunas giuvnas ell’economia che seigien ella medema situaziun sco el seigi staus, di Oliver Seifert. «Jeu haiel per exempel survegniu annunzias da persunas dalla Tiaratudestga cura ch’jeu haiel encuriu persunal pil Turrahus.» Denter quellas erien persunas cun  studis da bachelor e master en posiziuns da cader ell’economia. «Tala glieud qualificada ei s’annunziada tier mei per luvrar sco allrounder.» La lavur el management industrial seigi ina lavur diraglia. Forsa ch’el hagi resentiu quei pér cun vegnir pli vegls, di Oliver Seifert che ha brattau il mund dall’economia cun ina nova lavur sco ustier en Val Stussavgia.

«La glieud vegn tier mei»

L’impressiun d’esser en in liug solitari el Turrahus lai Oliver Seifert buca valer. «La glieud vegn tier mei ed jeu sun ensemen cun miu team e sch’jeu sun inagada persuls, lu haiel jeu finalmein la caschun d’haver ils cuolms e la natira mo per mei.» El seigi in alpinist da hobi passiunau. «Jeu haiel schon era bugen la cumpignia da carstgauns, mo quella vegnel jeu adina ad haver duront las jamnas da stagiun aulta.»

Entochen ussa hagien el e siu team cun Hajnalka, Nàndor e Natalia giu biaras caschuns d’emprender d’enconuscher la glieud dalla Stussavgia. Quella vegli naturalmein saver tgi ch’il niev el Turrahus seigi suenter ch’il antecessur seigi staus cheu varga 20 onns. El mument hagi el hosps dalla Svizra, Tiaratudestga ed Austria che mondien culs calzers da neiv, raquenta l’ustier che di ch’el seigi in Tiroles carschius si ella Bavaria. «Ils acturs impurtonts el Turrahus ein mes treis collaboraturs en cuschina ed el service. Jeu mez sun adina alla front cun beneventar, survir e dar adia a mes hosps.»

Kaiserschmarrn e talgias viennesas

Il niev ustier dil Turrahus emprova da satisfar a tons giavischs culinars sco pusseivel. El offerescha specialitads grischunas e talas da sia patria, il Tirol e la Bavaria. Ina famiglia seigi stada dacuort tier el ed hagi empustau Kaiserschmarrn ch’el hagi fatg reclama ellas medias socialas. «Sch’jeu saiel satisfar cun in plascher culinaric ord mia patria, fetschel jeu bugen quei», declara Oliver Seifert. «Jeu tscherchel denton buc il turissem da massa che sballuna viaden tier mei en roschas. Jeu viel haver peda pil discuors culs hosps. Jeu lavurel era buca sco ustier da gourmet. Mia ponderaziun ei da porscher atgnas tratgas da buna qualitad. Quei ei il bul persunal ch’jeu vi dar sco gastronom el Turrahus. E quei ch’jeu vuless surtut ei che mes hosps sesentan bein ed han plascher dil Turrahus.»