Trais dis nagut auter che aua

Uschia sco mes collega da lavur, David Truttmann, na crai jau era betg dad esser ina persuna da las modas. Dacurt aveva el descrit sia experientscha cun betg baiver alcohol durant il mais da schaner – il uschenumnà: «Dry January». In entir mais senza in schluc alcohol? Chapeau per quai!

Jau na fiss crai betg bun da tegnair la dira. Mo gia, sche jau pens vi dal Bumaun betg. Dentant, cun la tematica da giginar hai jau era fatg in’experientscha sumeglianta avant dus onns. Quai cun esser vegnì inspirà d’in anteriur collega da lavur, che deriva da la Tirchia e che ha raquintà davart ils effects positivs dal giginar per trais dis bavend mo aua durant il temp da Pasca.

La moda e maniera co preparar il corp ed oravant tut il tract digestiv endretg sin quests dis è gist tant impurtanta sco il giginar sez. Il vala numnadamain da reducir las calorias pass per pass per var trais dis ordavant. Suenter intginas retschertgas ed in scleriment cun mes medi da chasa, hai alura gì num: «Top, die Wette gilt!». Cun in resultat impressiunant.

Per l’ina, jau hai tegnì la dira. In sentiment da calma fitg profund cur ch’il corp accepta la nova realitad e cumenza a duvrar mo anc il grass sco benzin per metter en moviment il motor. E per l’autra recepesch jau uss il mangiar e las mangiativas tut auter. Jau celebresch numnadamain mintga buccada. E sco il magiel vin en favrer, èn era las emprimas morsas suenter il baiver aua stadas ina sensaziun nundescrivibla, degna da recumandar.