Döners fatgs a chasa

Tgi che ha teenagers a chasa sa: macaruns cun sos’alva, pizza e bizochels da la nona sco tratgas preferidas – quai era ina giada. Uss èsi fajitas, sushi e döners. Entant che fajitas e sushi po vegnir preparà anc magari facilmain a chasa, ma pareva in zic pli cumplitgà da far döners. Enfin che jau hai vis en las medias socialas in bun tip, co far döners a chasa.

Ils paunins plats èn svelt fatgs: in mez kilo farina, in tschadunin zutger e sal, levon cun 300 ml aua tievia, dus tschaduns gronds ieli dad ulivas e dus tschaduns gronds jogurt. Truschar la pasta, laschar ir si e lura furmar ils paunins ed als smatgar plats ed en il furnel per 10 minutas sin 230°C.

Metter in pachet charn zappada cun las spezarias giavischadas tranter dus palpiris da furnel e zullar ora enfin che tut è magari plat. Lura far rollas, sco rulladas, cun la charn e metter era quai per 20 minutas sin 200°C en il furnel.

Tgi che preferescha pulaster, quel po marinar in u dus filets e schelar quels. Cur ch’els èn dirs, pon ins grattar il pulaster uschia ch’ins po lura brassar las flettas finas en in test da brassar.

Vitiers anc la salata, tschagula, tomatas… tut quai ch’ins ha gust ed ina buna sosa da jogurt e bun appetit cun il döner fatg a chasa.