Lectura Rumantscha

Radunanza a Cuira, sin pista a Breil – ed in termin spustà a Scuol.

Tradiziun flexibla

Che la saira da Nadal è ils 24-12 è cler. Nagin na vegniss sin l’idea da stuschar quest termin sin in’auter di, u? Tar Chalandamarz para quai dad esser in pau auter. A Scuol vegn l’usit per stgatschar l’enviern quest onn ad avair lieu gia la fin da favrer, e betg sco «usità» ils 1. da mars. Quai pervia dad ina regla extraordinaria. Tradiziun vivida è flexibla, u betg?!

Tractandas principalas

Manipulaziun scharmanta, plans per spazzar ina plazza da minigolf ed in protocollist che discurra cun morts. En la nova cumedia dal Teater Cuira «Die Gemeindeversammlung» – inspirà dad in cudesch da Donat Caduff – sto en emprima lingia la vischnanca dad Oberflüeli vegnir spendrada. Ma emprim fan ils politichers locals valair lur agens interess… La FMR ha visità in’emprova.

Sin pista

Es ti stà sin pista quest’emna? Sche gea, lura es ti segir era pertschert che ina massa glieud procura che tut funcziunia: Tgi dat vi il «bügel», tgi controllescha las pistas, e tgi venda bigliets. Noss redactur ha fatg ina visita en il territori da Breil e tschantschà cun collavuraturas e collavuraturs, tranter auter era cun Anita Albrecht (foto sutvart).

Bun divertiment cun la Lectura Rumantscha!