«Il mund brischa e nus discurrin da minigolf»

«Nus schain manzegnas a la glieud», di in ­suprastant.

«Quai n’è nagina manzegna. Igl è la vardad en vestgì d’ina manzegna. Quai è modern», di la presidenta communala.

«Lura è la decleraziun da mia charn pia era moderna», di l’ustier che fa era part da la ­suprastanza.

Uschia tuni ad Oberflüeli, curt avant la radunanza communala. I va sin il viv durant la radunanza – numnadamain per il salvament dad Oberflüeli. Ma avant la tractanda decisiva èsi l’emprim anc da decider davart minigolf e crema da sulegl.

Il toc «Die Gemeindeversammlung» vegn mussà per l’emprima giada la mesemna proxima en il teater da la citad da Cuira. Igl è pia ina primaudiziun. La FMR ha dastgà dar in tgit en ina emprova in’emna avant la premiera.

Presidenta manipulativa

Ella faschess probablamain tut per Oberflüeli. Zora Caipirossi-Rup è presidenta communala e vegn giugada dad Eleni Haupt. En ils egls da la presidenta è la vischnanca smanatschada. La regenza vul metter sut curatella la vischnanca, che n’ha relaschà nagin budget e sposta trasora decisiuns impurtantas.

La presidenta ha dentant in plan. E per tegnair sin lingia ses suprastants dovra ella tut ils rampigns pussaivels. Ella fa per exempel finta d’esser inamurada en il suprastant ed ustier Simon Schlauch, giugà da Lorenzo Polin. Lez è pli che alterà. Pertge el ha agens plans e siemis.

L’ustier sa grittenta

El siemia da spazzar la plazza da minigolf avant sia ustaria per savair far ina uschenumnà Biergarten. La radunanza communala duai lubir quai. La tractanda para l’emprim da vegnir approvada senza problems.

Ma tuttenina tuts che vulan exnum mantegnair il minigolf, malgrà che l’indriz vegn nizzegià be dad ina suletta persuna e be ina giada il mais. E stat l’indriz forsa anc sut protecziun da monuments? L’ustier Simon Schlauch sa grittenta mordio che la suprastanza ed era ils burgais – giugads d’in chor – cumbattan tuttenina sia proposta.

Tac da grass

«Il mund brischa e nus discurrin da minigolf», recloma Vreni Lindemann, giugada dad Eve Lyn Scheiben. Ella è la conscienza ecologica e sociala en la suprastanza e citescha stinadamain Carolin Emcke.

I dess chaussas pli impurtantas da discutar, per exempel dad eriger abitaziuns socialas sco ch’ella ha proponì dacurt, sa vilenta Vreni Lindemann. «Ma tge è capità? Mia proposta è vegnida refusada pervi d’in tac da grass.» Ins haja figurà ch’il tac da grass saja in sbagl formal.

Ils auters suprastants la regordan dentant che betg «il sbagl formal» è stà la culpa, mabain il fatg ch’ella vuleva bajegiar las «abitaziuns per paupers» sin sia atgna parcella per gudagnar in sfratg raps.

Crema da sulegl

Era il suprastant Alphons Heidenreich, giugà da Jonathan Ferrari, frunta be sin opposiziun cun sia proposta da spustar il temp d’avertura dal post da recicladi. Durant il di fetschia quai ina chalira nunditga sin il post da recicladi – pervia da la midada dal clima. Ma i dat ina cuntraproposta: simplamain postar buttiglias da crema da sulegl al post da recicladi empè da spustar il temp d’avertura.

La figura pli curiusa è però il protocollist Laszlo. Dapi decennis scriva el gia ils protocols da las radunanzas communalas. El discurra cun morts ed è quella persuna che dat minigolf ina giada il mais – adina a mesanotg. Sa sch’el savess forsa era relevar il misteri dal murdraretsch ch’è vegnì commess avant intgins onns en vischnanca?

«Sch’i va per Oberflüeli sun jau il profi»

Ella daventa turbulenta, questa radunanza communala. E la tractanda pli impurtanta, quella dal salvament dad Oberflüeli, lezza vegn gea pir anc. Fissi forsa pli prudent da surlaschar a profis quest salvament? «Nus essan qua ils profis», protesta la presidenta communala. «Jau viv qua dapi 45 onns (…) Jau sun en l’uniun da gimnastica. En l’uniun da costums. En l’uniun vegana. En l’uniun da tschaiver (…) Sch’i va per Oberflüeli sun jau il profi.»

Inspirà da Donat Caduff

La sbrinzla inspirativa per quest teater deriva dal cudesch «Das Gelbe des Eis» da Donat Caduff che sa basa sin vairs protocols da radunanzas communalas en il Grischun. Il reschissur Manfred Ferrari ha gì l’idea da far londeror in teater. L’autur Lukas Linder ha lura scrit il toc «Die Gemeindeversammlung» cun in pau in auter decurs ch’il cudesch da Donat Caduff.