Release a la parti da Chalandamarz in Stüva

«Da Janaiverin süls Lais da Macun, fin pro’ls Nanins da Samignun: Els chavaivan or e vendaivan tabac, ma ingün nu tgnaiv’aint il tact.» Quai vain chantà illa chanzun dal cumponist grischun Flavio Bundi chi’d es gnüda scritta aposta pels 7 Nanins da Scuol. Els dan aint daspö trais ons il tact in Engiadina Bassa ed in sonda saira vain fat viva süls 7 Nanins in Stüva a Scuol. In quist’occasiun preschaintan ils 7 Nanins eir las prümas duos registraziuns ch’els han fat quist inviern i’l studio da Mischa Weiss a Sent.

A partir dals 1. marz sun quistas duos chanzuns online e da dudir sün tuot las plattafuormas da musica. Sper la chanzun da Flavio Bundi han ils nanins registrà eir üna cuntschainta chanzun dals Fäaschtbänklers in lingua rumantscha. Quista nouva chanzun rumantscha tematisescha ils miraculs da quist muond ed intimescha da giodair la cumpagnia ed il mumaint. La parti da Chalandamarz in Stüva a Scuol cumainza in sonda saira a las 22.00. Sper ils 7 Nanins pissera eir DJ Blacky da Scuol per trategnimaint. (cdm/pl/fmr)