Narr e bagat van online

Igl ei stau ina scuvretga plitost casuala dalla pagina troccas.com. Quei ei ina pagina che porscha la pusseivladad da dar troccas vid imeisa digitala. La pagina porscha era entginas informaziuns davart il giug e sia derivonza. Ella fa attent allas atgnadads dil giug cun diversas reglas che sedifferenzieschan dad in vitg ni dad ina regiun a l’autra. Las indicaziuns silla pagina tradeschan enconuschientschas detagliadas digl origin dallas troccas e co ei vegn giugau. La pagina indichescha ina adressa da contact ch’ei via mail promta da prender encunter resuns sil giug. Tgi ha denton lantschau quella pagina da giugar online?

Nunenconuschent

Ils exponents dalla Uniun grischuna da troccas ch’organiseschan mintgamai il campiunadi grischun da troccas san nuot dad ina purschida da giugar online. Ton Annalisa Cathomen sco Andreas Muoth demuossan denton interess viers la nova pusseivladad da giugar. Martin Cantieni che s’engascha cun siu frar Gion Andri Cantieni regularmein per survetschs digitals romontschs sa medemamein nuot dalla pagina da troccas. «Nus havein gia discutau da scaffir sez ina tala purschida», gi Martin Cantieni. Tgi che ha denton fatg igl emprem pass cun il giug da troccas ella reit sa el buc. «Ei dat secapescha bia Romontschas e Romontschs ch’ein habels da far quei.»

In project privat

Daferton ei ina risposta vegnida via mail sin la damonda suenter igl origin dalla preschientscha da quella part dalla cultura romontscha ella reit. Ina risposta per engles sutsignada da Youngjung Cho. El scriva da haver empriu d’enconuscher las troccas entras sia amitga e la famiglia dalla amitga. «Atgnamein vai jeu programmau quella pagina sco project privat per possibilitar alla famiglia ed a mia amitga da giugar troccas senza seser direct a meisa.»

Youngjung Cho fa attent che la pagina seigi aunc buca finida e per quei intent seigi el era buca segirs, sche la purschida possi cuntentar per il mument. E l’amitga da Youngjung Cho senumna Silvana Wieland ed ei carschida si a Cumpadials. Ella studegia scienzia da material alla Scola politecnica federala e Youngjung Cho che deriva dalla Corea dil Sid studegia ella medema scola aulta electronica e tecnologia da communicaziun. Quei ei secapescha ina basa ideala per scaffir in giug da troccas online.

Impurtonta part dalla cultura

Silvana Wieland ha empriu da giugar troccas en siu dacasa a Cumpadials. Per ella ei quei giug ina impurtonta part dalla cultura romontscha sursilvana. «Miu amitg ha vuliu scaffir enzatgei per la regiun e jeu hai fatg la proposta da crear in giug da troccas online.» Silvana Wieland puntuescha ch’il giug seigi aunc buca finius. «Igl ei per il mument aunc buca pusseivel da veser las cartas e per tschintschar stuess ins aunc integrar ils mieds da communicar directs.» Per la giuvna studenta e siu amitg eis ei secapescha era ina damonda dallas finanzas con gitg ch’els vulan sviluppar e mantener la pagina. «Segirar e registrar il num dalla pagina ha gia custau e duvrar il survetsch dad in server cuosta cuntinuadamein.» Silvana Wieland ei cunscienta ch’ei fuss enzacu necessari dad encurir sponsurs per la pagina da giugar troccas. E Youngjung Cho ei buca sulet habels da programmar ina pagina da giugar troccas, el sa era giugar sez. En sia patria dalla Corea dil Sid dat ei probablamein paucas persunas che san giugar troccas. Forsa ei il giuven student dalla Scola politecnica federala era il sulet. Quei sa denton semidar, sche las troccas anflan dapli adherents ella reit.

Dapli sin www.troccas.com